Pas arritjes së Marrëveshjes për votimin e Qeverisë në seancën e nesërme parlamentare, LDK ka caktuar sot emrat e funksionarëve në ekzekutiv.
LDK ka vendosur ta propozojë për Ministër të Punëve të Brendshme Agim Veliun. Me këtë rast, Podujeva do të shkojë në zgjedhje të jashtëzakonshme, njofton gazeta Express.
Vendimi është marrë në mbledhjen e Kryesisë së LDK’së, ku mësohet se Avullah Hoti është caktuar të jetë Zëvendëskryeministër.
Anton Quni është propozuar për Ministër të Mbrojtjes. Besian Mustafa për Ministër të Bujqësisë. Hykmete Bajrami për Ministre të Arsimit dhe Vlora Dumosh në Zhvillim Ekonomik.
Në marrëveshjen mes Vetëvendosjes dhe LDK-së, Albin Kurti do të udhëheq Qeverinë, ndërsa Vjosa Osmani Parlamentin. Për postin e presidentit, dy partitë janë dakorduar që të bisedojnë kur të vijë koha për të zgjedhur pasuesin e Hashim Thaçit.
