Në Kuvend për të tretën ditë debatohet për Propozim ligjin për regjistrimin e popullsisë, amvisërive dhe banesave në Republikën e Maqedonisë së Veriut. Edhe dita e tretë e debatit, si dhe dy ditët e mëparshme, kaluan me pikëpamje të kundërta mes pushtetit dhe opozitës, kryesisht nëse vendi ka nevojë për regjistrim pikërisht këtë vit dhe sa procesi do të jetë me të vërtetë statistikor, ndërsa jo politik.
Deputetja e LSDM-së, Lidija Tasevska theksoi se VMRO-DPMNE nuk do të parandalojë regjistrimin konform me standardet dhe praktikat ndërkombëtare.
“Është plotësisht e paqartë pse Mickoski dhe VMRO-DPMNE e kundërshtojnë ligjin, përveç nëse qëllimi i tyre është që me qëllim ta problematizojnë mbajtjen e regjistrimit në mënyrë që shteti edhe më tej të mos ketë të dhëna që janë të rëndësishme për krijimin e politikave dhe strategjive afatmesme dhe afatgjata”, tha Tasevska.
Ajo thekson se vendi pa regjistrim është tashmë 19 vjet, ndërsa regjistrimi i fundit në 2011 dështoi pikërisht për shkak të “paaftësisë së VMRO-DPMNE-së”.
“Sot kjo parti përsëri e politizon këtë operacion të rëndësishëm statistikor. Në Kuvend, para neve deputetëve është ligji për regjistrimin e popullsisë, një ligj me të cilin hapet hapësirë këtë pranverë për të kryer regjistrim në përputhje me standardet ndërkombëtare, në përputhje me rregulloret e Eurostat-it. LSDM-ja ka marrëveshje me qytetarët për të kryer një regjistrim që do të sigurojë të dhëna të sakta dhe relevante”, theksoi Tasevska.
Deputeti nga VMRO-DPMNE, Aleksandar Veljanovski tha se bëhet fjalë për ligj të keq, i cili lë hapësirë për manipulim dhe është kontradiktor.
“Për të tretën ditë, apelojmë që ky ligj të tërhiqet, të jepet për përpunim në mënyrë që të miratohet një ligj solid për regjistrimin i cili do të miratohet me një konsensus të gjerë shoqëror”, tha Veljanovski.
Deputetja e BDI-së, Arta Bilalli-Zendeli tha se ligji është përgatitur në përputhje me standardet ndërkombëtare bazuar në rekomandimet e KB-së. Ajo theksoi se në vendet e zhvilluara, qytetarët inkurajohen të marrin pjesë në regjistrim, ndërsa jo në bojkot.
“Qytetarët duhet të përfshihen në procesin e regjistrimit, jo të bëjnë thirrje për bojkot para se të fillojë. Sipas Rregullores 763/2008, të dhënat periodike të qytetarëve janë relevante dhe të rëndësishme për programet e zhvillimit”, tha Bilalli-Zendeli.
Deputetët nga VMRO-DPMNE, duke iu përgjigjur deputetes Bilalli-Zendeli, theksuan se ata nuk bëjnë thirrje për bojkot, por kërkojnë tërheqjen e ligjit dhe përpunimi e tij. Ata pretendojnë se me regjistrimin do të shënohen qytetarë që nuk jetojnë në vend dhe kështu, sipas tyre, “do të jepen rezultate të gabuara me çka gabimisht do të planifikohen dhe do të shpërndahen investime për zhvillimin e rajoneve të ndryshme”.
Ndryshe, kryetari i Kuvendit, Talat Xhaferi tha se debati do të vazhdojë deri në shterjen e të njëtës. Për fjalim janë paraqitur edhe tetë diskutues të tjerë dhe pritet deri në fund të ditës deputetët të votojnë miratimin e Ligjit.
