Do të ketë mjaftueshëm vaksina që të vaksinohet popullata. Shteti nuk do të kursejë para për furnizimin e vaksinave, porositi dje kryeministri Zoran Zaev.
Në pjesëmarrjen në emisionin “Top tema” në televizionin Tellma, kryeministri kumtoi se dje është paguar avanca për 833 mijë vaksina të cilat do të furnizohen përmes sistemit Kovaks, ndërsa është siguruar edhe garanci për pjesën tjetër të parave që duhet të paguhen pas ardhjes së vaksinave.
“Sot në Qeveri kaloi sigurimi i garancisë që përmes ankandit publik e ofruan më shumë banka. Fitoi Banka Komerciale me provizionin më të ulët për shtatë milionë euro e gjysmë të tjerat duhet t’i paguajmë kur të vijnë vaksinat. Janë organizuar të paktën nëntë kompani të cilat i kanë siguruar të gjitha kushtet për ruajtjen e vaksinave”, tha Zaev.
Përveç përmes sistemit Kovaks, janë kërkuar edhe 800 mijë vaksina prej 100 milionë vaksinave që Bashkimi Evropian i furnizon për të gjitha vendet e Evropës të cilat nuk janë anëtare të Bashkimit Evropian, ndërsa një sasi të caktuar kryeministri e pret edhe nga Greqia, e cila, siç tha, ka furnizuar vaksina për veten por edhe për Maqedoninë e Veriut dhe për Shqipërinë.
Vaksinimi do të shkojë njëjtë sikurse edhe në shtetet e tjera – fillimisht punonjësit shëndetësorë, qytetarët më në moshë dhe të sëmurët kronikë.
“Për ne është shumë e rëndësishme kur vaksina të mbërrijë në Evropë, të mbërrijë edhe tek ne”, theksoi Zaev në intervistën për televizionin Tellma.
