Ministri i Jashtëm i Serbisë, Ivica Daçiq, bërë të ditur se SHBA-ja dhe Rusia tash për tash mbështesin absolutisht dialogun në mes të Kosovës dhe Serbisë që mbahet në Bruksel.
Ai ka thënë se të dy superfuqitë janë gjithashtu të gatshme që ta pranojnë një marrëveshje të arritur mes të dyja vendeve ballkanike, shkruan Most, përcjell Klan Kosova.
Këto deklarata Daçiq i ka bërë pas takimeve me zyrtarë amerikanë në Uashington, ku ka shtuar se administrata aktuale në SHBA i ka parasysh interesat e Serbisë.
“Situata ka ndryshuar shumë pas arritjes së administratës së re dhe këtë më ka thënë këshilltari për Siguri Kombëtare. Në të gjitha dekadat e kaluara politika e jashtme e SHBA bazohej në një autopilot, por që tash gjërat kanë ndryshuar”, ka thënë Daçiq.
Ministri serb tha se politika amerikane ndaj Serbisë dhe Kosovës deri tani ka qenë në “autopilot”, por se ajo është ndryshuar me ardhjen e ndihmësit të ri të sekretarit shtetëror të SHBA-së për Evropë dhe Euroazi, Ves Mitçell.
Ai shtoi se nuk ka kurrfarë gjasash që procesi i negocimit të përfundojë me dhënien e ulëses për Kosovën në OKB ose njohjen e Kosovës.
Ambasadori i SHBA-së në Serb, Kajl Rendolf Skot, u tha gazetarëve se qëndrimi amerikan ka qenë dhe ende është që zgjidhja stabile lidhur me Kosovën doemos duhet të gjendet përmes negociatave mes Beogradit dhe Prishtinës. (MIA)
