Më 25 nëntor 1999, një grup qytetarësh maqedonas dhe një Maqedonase, shtetase amerikane, hodhën themelet e njërës prej organizatave më të njohura të shoqërisë civile në Republikën e Maqedonisë së Veriut, CIVIL – Qendra për liri. Grupi themelues përbëhej nga intelektualë, artistë, gazetarë, një biznesmen dhe një punëtor.
Në njëzet e dy vjet, organizata ka zbatuar më shumë se 100 projekte në disa fusha kritike të proceseve socio-politike të vendit. Ajo ishte pionier i procesit të paqes dhe pajtimit në vitin 2001, një nga organizatat më të spikatura në luftën kundër armëve të paligjshme, duke udhëhequr fushata të mëdha kombëtare kushtuar multikulturalizmit, të drejtave të njeriut, lirisë dhe demokracisë. Popullariteti i CIVIL-it i kalon larg kufijtë e vendit tonë dhe aktualisht është një nga organizatat më të respektuara të shoqërisë civile në Ballkan.
Kryetari dhe njëri nga themeluesit e CIVIL-it, Xhabir Deralla, ua uron përvjetorin e themelimit të organizatës themeluesve, anëtarëve të Kuvendit të CIVIL-it dhe të gjitha organeve dhe njësive organizative, të gjithë anëtarëve dhe përkrahësve.
“Çdo 25 nëntor është një ditë e madhe për ne. Është një kujtesë e përkushtimit, qëndrueshmërisë dhe elasticitetit tonë. Zonja dhe zotërinj, ju uroj edhe shumë suksese në punën tuaj dhe angazhimin qytetar në forcimin e demokracisë, sundimit të ligjit, vlerave evropiane dhe të gjelbra, multikulturalizmit, drejtësisë sociale, paqes, sigurisë dhe të drejtave dhe lirive të njeriut në vend dhe në botë. Ne jemi mirënjohës për mbështetjen e sinqertë dhe besimin e madh që na japin qytetarët. Në emër të CIVIL-it dhe në emrin tim, falënderoj të gjithë donatorët gjatë këtyre 22 viteve. Ndihma e tyre është një kontribut i çmuar për përkushtimin tonë për një të nesërme më të mirë për të gjithë qytetarët e Maqedonisë së Veriut dhe botës”, ka shkruar Deralla në mesazhin e tij.
Ekipi i CIVIL-it do ta shënojë këtë përvjetor në mënyrë modeste dhe me punë, me stenda informative në mbarë Shkupin dhe në disa qytete të vendit, si dhe para selisë së organizatës ku do të shpërndahen libra, distinktivë dhe materiale të shtypura për vizitorët, që nga fillimi i javës së ardhshme. Organizata fton bashkëpunëtorët, mbështetësit dhe anëtarët e saj, si dhe të gjithë qytetarët që të kontribuojnë në festë duke dërguar një tekst të shkurtër ose video selfi në të cilën do të ndajnë një mesazh, mendim, vlerësim apo anekdotë lidhur me CIVIL-in.
