Ministrat e Punëve të Jashtme të anëtarëve të Grupit të shtatë kombeve të industrializuara (G-7) e konfirmuan angazhimin e tyre të përbashkët për sigurinë, rimëkëmbjen ekonomike dhe perspektivën evropiane të Ballkanit Perëndimor, si një investim kryesor në paqen dhe stabilitetin dhe e mbështetën progresin e mëtejshëm në bashkëpunimin rajonal, veçanërisht përmes Tregut të Përbashkët Rajonal, Agjendës së Gjelbër për Ballkanin Perëndimor dhe Procesit të Berlinit, njoftoi korrespondentja e MIA-s nga Beogradi.
Në deklaratën e përbashkët, ministrat e mbështetën hapjen zyrtare të negociatave për anëtarësim në BE me Maqedoninë e Veriut dhe Shqipërinë dhe zbatimin e një agjende reformash në lidhje me bisedimet e pranimit në BE me Malin e Zi dhe Serbinë, thuhet në kumtesën e përbashkët të Shërbimit evropian për punë të jashtme (EEAS).
Ministrat i bënë thirrje Kosovës dhe Serbisë që të përfshihën në mënyrë konstruktive në negociatat për dialog me ndërmjetësim të BE-së dhe t’i ormalizojnë plotësisht marrëdhëniet e tyre përmes një marrëveshje gjithëpërfshirëse dhe ligjërisht të detyrueshme që kontribuon në stabilitetin rajonal.
Në deklaratën e përbashkët, ministrat e Punëve të Jashtme të G7 ashpër e refuzojnë çdo përpjekje për ta minuar integritetin territorial të Bosnje e Herzegovinës, duke thënë se spekulimet e pajustifikuara të ndryshimeve të kufijve etnikë nuk janë zgjidhje për sfidat e rajonit dhe se ndryshime të tilla do të ishin kërcënim për sigurinë në rajon.
Ministrat u bënë thirrje të gjitha partive në BeH të bien dakord dhe të zbatojnë reforma elektorale dhe të kufizuara kushtetuese, t’i zbatojnë vendimet e Gjykatës Evropiane të të Drejtave të Njeriut dhe të bashkëpunojnë ngushtë me Zyrën e OSBE-së për Institucionet Demokratike dhe të Drejtat e Njeriut (ODIHR) dhe Komisionin e Venecias për afrimin e vendit në aspiratat demokratike.
Ata, gjithashtu, e përshëndetën kandidaturën e Kristian Shmit për përfaqësues të lartë në BeH.
Në pjesën nga deklarata e përbashkët për Ballkanin Perëndimor potencohet rëndësia për avancim të reformave të nevojshme të brendshme, veçanërisht mbi sundimin e ligjit, përfshirë luftën kundër krimit të organizuar, financave të paligjshme dhe korrupsionit, duke ndërmarrë veprime të forta kundër çështjeve më drastike.
