Drejtoresha e përgjithshme e Fondit Monetar Ndërkombëtar (FMN) Kristalina Georgieva dhe guvernatorja e Bankës Popullore Anita Angelovska-Bezhoska mbajtën takim onlajn, të cilin Georgieva e përshkroi si produktiv në llogarinë e saj në Tuiter.
“Bisedë produktive me guvernatoren e Bankës Popullore të Maqedonisë së Veriut, Angelovska Bezhoska. Banka Popullore luan një rol vital për zbutjen e ndikimit të krizës dhe sigurimin e stabilitetit ekonomik dhe financiar. Profesionalizmi dhe pavarësia e saj janë esenciale, shkroi ajo.
Nga Banka Popullore kumtuan se në takimin e mbajtur dje, Georgieva theksoi se Banka Popullore ka një rol vital në zbutjen e ndikimit të krizës dhe sigurimin e stabilitetit ekonomik dhe financiar.
“Profesionalizmi dhe pavarësia juaj janë të një rëndësie kyçe”, tha ajo në takimin me guvernatoren e Bankës Popullore, Anita Angelovska-Bezhoska.
Në takim, siç u njoftua sot nga BankaPopullore, u theksua rëndësia e institucioneve të forta dhe të besueshme, veçanërisht në kohë krizash, kur ata duhet të bëjnë gjithçka që është e nevojshme për të ruajtur besimin dhe mbështetjen e familjeve dhe kompanive. Gjithashtu u theksua se profesionalizmi dhe pavarësia e bankës qendrore janë parakushtet kryesore për përmbushjen e mandatit të saj, duke përfshirë sigurimin e stabilitetit të përgjithshëm të sistemit financiar.
Guvernatorja Angelovska-Bezhoska theksoi mbështetjen dhe partneritetin nga FMN-ja ndër vite. “Për ne është veçanërisht e rëndësishme për ne që të kemi një partner ndërkombëtar me integritet të fortë, profesionalizëm dhe ekspertizë, i cili vazhdimisht investon në përmirësimin e kapaciteteve tona dhe na ndihmon të forcojmë rolin tonë në shoqëri”, theksoi guvernatorja Angelovska-Bezhoska.
Lidhur me krizën aktuale shëndetësore, Georgieva dhe Angelovska-Bezhoska diskutuan pasigurinë dhe sfidat për politikëbërësit në periudhën e ardhshme. Në takim u theksua se vigjilenca dhe kujdesi global janë të nevojshme në këto rrethana dhe për shkak të pasigurisë për kohëzgjatjen dhe pasojat e pandemisë. Kjo, sipas deklaratës, i referohet gjithashtu politikave të sektorit financiar, në të cilat duhet të ketë masa për të forcuar qëndrueshmërinë e sistemit financiar. Në këtë kontekst, nevoja për kujdes në politikat e shpërndarjes së dividentit u theksua si një hap i rëndësishëm në ndërtimin e kapacitetit të sistemit, derisa të fillojë një proces i rimëkëmbjes së qëndrueshme.
Në takim u konkludua se FMN-ja dhe Banka Popullore do të vazhdojnë me bashkëpunimin intensiv, duke i mbështetur përpjekjet për të krijuar përfitime për ekonominë dhe shoqërinë dhe duke mbrojtur interesin publik.
Në këtë drejtim, pjesëmarrja vullnetare e Bankës Kombëtare në vlerësimin pilot të pajtueshmërisë me Kodin e FMN-së të transparencës së bankave qendrore vlerësohet si një investim shtesë i rëndësishëm në forcimin e transparencës dhe integritetit të institucionit.
