Drejtori rajonal i OBSH-së për Evropë, Hans Kluge ka thënë se shteti përveç që ka porositur vaksinat përmes mekanizimit KOVAKS, poashtu i ka përfunduar të gjitha procedurat financiare dhe administrative.
“Porosia është bërë, janë kompletuar procedurat financiare dhe administrative. Jam në kontakt të vazhdueshëm me ministrin e Shëndetësisë Venko Filipçe. Para saktë një viti kam qenë në Shkup dhe prej atëherë punojmë bashkërisht. Sistemi është përpiluar nga ana e shtetit, është bërë gjithçka që duhet, por atë që duhet ta dimë është të ketë edhe pak durim, të respektohen masat për shëndetin publik”, ka thënë Kluge në intervistën për Televizionin Telma.
Ai ka potencuar se e gjithë bota po përballet me mungesë të vaksinave dhe se prodhuesit doemos të rrisin prodhimin, ndërsa solidariteti i vendeve është arma e vetme kundër virusit.
“Solidariteti tani për tani është arma e vetme kundër virusit. Armiku është virusi. Jemi të përkushtuar në solidaritet. Çdo shtet po lufton, është e vërtetë se kemi problem dhe prandaj është me rëndësi të rritet kapaciteti i prodhimit, pasi e gjithë bota përballet me këtë mungesë”, shton Kluge.
