Qeveria e Republikës së Maqedonisë së Veriut sot do të mbajë mbledhjen e rregullt të 50-të, në të cilën me propozim të Zyrës së Kryetarit të Qeverisë, në mbledhje do të shqyrtohet Raporti për procesin e pilotimit të modelit të ri për vlerësimin e mbështetjes arsimore, shëndetësore dhe sociale shtesë të fëmijëve dhe të rinjve, bazuar në Klasifikimin Ndërkombëtar të Funksionimit (KNF), si standard botëror për kualifikim, i miratuar nga Organizata Botërore e Shëndetësisë në vitin 2001.
Në mesin e pikave të rendit të ditës nga programi për punë dhe me interes të qytetarëve, Qeveria në seancë do ta shqyrtojë edhe Propozim-ligjin për shpalljen e një pjese të Malit Sharr për Park Nacional, Informacioni për gjendjen me ndotjen e ajrit dhe nevoja për vazhdim të procesit të shkëmbimit të karburanteve joekologjike në objektet publike në Republikën e Maqedonisë së Veriut parashtruar nga Ministria për Ambient Jetësor dhe Planifikim Hapësinor, ndërsa do të shqyrtohet edhe Propozim-programi për zhvillim rajonal të barabartë për vitin 2021 dhe 2022, propozuar nga Ministria e Vetëqeverisjes Lokale.
Për vendimet dhe konkluzat e miratuara në mbledhje, e cila është paraparë të fillojë në orën 12:00, opinioni do të njoftohet përmes kumtesës menjëherë pas përfundimit të saj, theksojnë nga pres shërbimi qeveritar.
