Kryeshefi i policisë së Kapitol Hillit, Stiven Sand, largohet nga funksioni më 16 janar pasi shërbimi u kritikua ashpër për lëshimet në sigurimin e Kapitol Hillit pas hyrjes së dhunshme në Kongres të ekstremistëve lojalë të presidentit Donald Tramp. Sandi e mori vendimin menjëherë pasi kryetarja e Dhomës Përfaqësuese, Nensi Pelosi, i bëri thirrje të japë dorëheqje.
“Z. Sand madje edhe nuk u lajmërua pas këtyre ngjarjeve”, theksoi Pelosi.
Dorëheqje të pjesëtarëve të sigurimit të Kongresit kërkoi edhe demokrati Çak Shumer, lider i pakicës në senat.
Sipas “Njujork tajms”, edhe Sindikata e Policisë së Kapitolit kërkoi dorëheqje të udhëheqësisë. Policia numëron 2.300 nëpunës në uniforma dhe civilë të angazhuar për sigurimin e Kongresit.
Të mërkurën, një turmë e tërbuar prej qindra protestuesve, mbështetës të Trampit, hynë në Kapitol dhe bëri dëm të madh material. Kjo shkaktoi zemërim midis anëtarëve të Kongresit, të cilët kërkojnë përgjigje pse policia nuk ka qenë e gatshme, derisa një pjese të madhe të atyre të cilët hanë në Kongresin e SHBA-së, u është lejuar pa problem të largohen pa u arrestuar.
Mbrëmë janë parashtruar edhe kallëzimet e para penale pas ngjarjeve të pakëndshme të mërkurën. Prokurorët federalë kanë parashtruar padi kundër një personi i cili ka sulmuar një polic dhe kundër një tjetri i cili ka poseduar armë në mënyrë të paligjshme.
