Deputeti i Parlamentit Evropian (PE), Lukas Mandel u tha qytetarëve të Kosovës se pas liberalizimit të vizave, që pritet gjatë muajve të ardhshëm, për qytetarët e Kosovës nuk ka asnjë shans për azil në Bashkimin Evropian (BE), njoftoi korrespondenti i MIA-s nga Prishtina.
“Nuk ka asnjë mundësi për azil, sepse Kosova është vend stabil” deklaroi Mandel në sesionin e dytë të Komisionit Parlamentar për Stabilizim-Asociim BE-Kosovë i cili mbahet në Prishtinë.
Deputetja e Partisë Demokratike të Kosovës, Blerta Deliu-Kodra duke e vlerësuar tejet të rëndësishëm votimin pro liberalizimit të vizave në Parlamentin Evropian u shpreh se rruga për plotësimin e kritereve për liberalizimin e vizave ka qenë mjaft sfiduese.
Delegacioni i Parlamentit Evropian, i udhëhequr nga eurodeputeti kroat Tonino Picula, prej dje po qëndrojnë në Kosovë që të njihen me progresin për përmbushjen e obligimeve nga marrëveshja për Stabilizim dhe Asocim me Bashkimin Evropian
Në seancën e djeshme të Komisionit Parlamentar mori pjesë edhe kryeministri i Kosovës Ramush Haradinaj i cili e shfrytëzoi mundësinë për t’i shprehur falënderim Parlamentit Evropian për votimin e vendimit, javën e kaluar, për liberalizimin e regjimit të vizave për qytetarët e Kosovës. (MIA)
