Sekretari i përgjithshëm i NATO-s Jens Stoltenberg shpreson se do të mund të dërgohet ftesë për anëtarësimin e Maqedonisë në Aleancë në Samitin që më 11 dhe 12 korrik do të mbahet në Bruksel, pasi Shkupi dhe Athina arritën marrëveshje për kontestin për emrin.
“Shpresoj se do të ketë progres me Ish Republikën Jugosllave të Maqedonisë sepse ata arritën marrëveshje me Greqinë për problemin me emrin. Nëse kjo marrëveshje finalizohet dhe zbatohet plotësisht emri i ri do të jetë Republika e Maqedonisë së Veriut dhe atëherë mund të nisemi drejt anëtarësimit të Ish Republikës Jugosllave të Maqedonisë në NATO. Sinqerisht shpresoj se këtë mund ta bëjmë”, deklaroi Stoltenberg në intervistën për televizionin francez “Frans 24”.
Në pyetjen nëse ka kornizë kohore për anëtarësimin e Maqedonisë, njeriu i parë i NATO-s thotë se kjo varet nga finalizimi i marrëveshjes në Shkup.
“Por, shpresoj se do të mund t’i fillojmë negociatat për anëtarësim, gjegjësisht të marrim vendim për fillimin e tyre në Samitin e NATO-s në korrik, nëse gjithçka zhvillohet sipas të planifikuarës rreth ratifikimit dhe referendumit i cili do të mbahet më vonë sivjet”, deklaroi Stoltenberg. (MIA)
