Liderët e Koresë së Jugut dhe të Koresë së Veriut, Mun Xhae dhe Kim Xhong-un përzemërsisht i kanë shtrënguar duart në takimin historik në zonën e çmilitarizuar në kufirin midis të dyja shteteve.
Pasi Kim e kaloi vijën e demarkacionit në zonën, i bëri thirrje presidentit Mun për një moment ta kalojë territorin e Koresë së Veriut. Mun atë e bëri edhe pse nuk ishte pjesë e procedurës së konfirmuar paraprake, lajmëruan mediat perëndimore.
Të dy liderët u kthyen në territorin e Koresë së Jugut ku ishte përgatitur ceremoni solemne për pritjen edhe prezantimin e anëtarëve të të dy delegacioneve. Për herë të parë një lider i Koresë së Veriut kalon në territorin e Koresë së Jugut nga fundi i Luftës Koreane (1950-1953). Lufta formalisht nuk ka përfunduar. Për herë të fundit të dy liderët janë takuar në vitin 2007.
Kim në takimin historik në delegacion e kishte edhe motrën e tij Kim Jo Xhong.
Mediat perëndimore lajmëruan se Kim në librin në “Shtëpia e paqes” ka shkruar “Historia e re fillon tani, vitet e paqes janë në fillimin historik”.
Pas fillimit të takimit Kim deklaroi se dëshiron të mbajë bisedime të sinqerta për çështjet aktuale dhe se shpreson se Samiti do të çonte drejt “rezultatit të mirë”.
“Shpresoj në shkrimin e një kapitulli të ri midis nesh dhe ky është fillimi. Ne do të sjellim fillim të ri. Shpresoj se do të plotësojmë pritjet që kemi nga njëri-tjetri, Shpresoj në marrëveshje që do të plotësojë pritje të mëdha “, theksoi Kim.
Lideri koreanoverior pas raundit të parë të bisedimeve e pranoi ftesën e Munit që ta vizitojë Korenë Jugore.
Sipas zëdhënësit të presidentëve koreanojugorë Jun Jung-xhan motra e liderit koreanoverior Kim Jo Xhong deklaroi se duhet që të përshpejtohet bashkimi i të dy Koreve, ndërsa Mun propozoi që të dy vendet të lidhen me linjë hekurudhore.
Burimi: MIA
