Dita Ndërkombëtare e Paqes | 21 shtator 2026
KUMTESË PËR MEDIA
Paqja kërkon liri, drejtësi dhe llogaridhënie. Do të thotë të jetosh pa frikë, t’i rezistosh shtypjes dhe t’i sjellësh kriminelët e luftës para drejtësisë. Një botë që shpërblen agresorët, ua mbyll gojën viktimave dhe bën pazare me të vërtetën është një botë që përgatitet për luftën e ardhshme.
Me rastin e Ditës Ndërkombëtare të Paqes, CIVIL – Qendra për Liri bën thirrje për refuzimin e qartë të hipokrizisë politike që e paraqet nënshtrimin si stabilitet, pandëshkueshmërinë si pajtim dhe braktisjen e atyre që janë nën sulm si një kompromis të arsyeshëm.
Paqja nuk mund të ndërtohet duke shpërblyer agresionin. Ajo nuk mund të sigurohet duke u kërkuar njerëzve të pranojnë pushtimin, të heqin dorë nga të drejtat e tyre apo të harrojnë të vrarët, të zhvendosurit, të torturuarit dhe të zhdukurit. Negociatat duhet t’i shërbejnë një paqeje të drejtë dhe të qëndrueshme, ndërsa njerëzit, jeta dhe liria e të cilëve janë në rrezik, duhet të kenë zë vendimtar për të ardhmen e tyre.
Lufta e agresionit të Rusisë kundër Ukrainës e bën këtë përgjegjësi të qartë dhe të pamohueshme.
Mbështetja për sovranitetin, lirinë dhe të drejtën e Ukrainës për t’u mbrojtur është një angazhim thelbësor për paqen. Solidariteti me njerëzit që janë nën sulm duhet të vazhdojë përtej deklaratave dhe datave përkujtimore.
I njëjti përkushtim ndaj dinjitetit njerëzor duhet të vlejë kudo.
Jetët e civilëve kanë vlerë të barabartë. Asnjë qeveri, ushtri apo grup i armatosur nuk ka të drejtë t’i shmanget llogaridhënies. Asnjë aleancë politike nuk mund të justifikojë indinjatën selektive apo indiferencën ndaj vuajtjes njerëzore.
Paqja minohet shumë kohë përpara se të shkrepet plumbi i parë. Ajo dobësohet kur institucionet kapen, gazetarët kërcënohen, diskriminimi normalizohet dhe propaganda i shndërron fqinjët në armiq. Në Maqedoninë e Veriut dhe në mbarë Ballkanin Perëndimor, kundërshtimi i nacionalizmit, korrupsionit, dezinformimit dhe glorifikimit të kriminelëve të luftës është pjesë thelbësore e punës për paqen.
Për CIVIL-in, të mbrosh paqen do të thotë të mbrosh demokracinë dhe të drejtat e njeriut çdo ditë — në institucionet publike, në media, në shkolla dhe në çdo komunitet ku frika dhe përjashtimi përdoren për të kontrolluar njerëzit.
Ky angazhim i jep kuptim praktik temës së Kombeve të Bashkuara për vitin 2026: “Investoni në paqe: Për të gjithë, kudo, çdo ditë.” Vlerësimi që OKB-ja u bën njerëzve që ndërtojnë paqen përmes veprimit të përditshëm në komunitetet e tyre lidhet drejtpërdrejt me një përgjegjësi që qeveritë dhe shoqëritë duhet ta marrin seriozisht.
Të investosh në paqe do të thotë të mbështesësh gazetarinë e pavarur, edukimin qytetar, mbrojtësit e të drejtave të njeriut, pjesëmarrjen e të rinjve dhe institucionet që i shërbejnë publikut. Do të thotë t’u sigurosh komuniteteve burimet për të kundërshtuar urrejtjen, për të demaskuar manipulimin dhe për të zgjidhur mosmarrëveshjet pa dhunë. Njerëzit që e bëjnë këtë punë kanë nevojë për mbështetje të vazhdueshme, mbrojtje dhe hapësirë për të vepruar.
“Për të gjithë” duhet të përfshijë edhe ata që janë shtyrë në margjina. “Kudo” duhet të arrijë edhe te komunitetet jashtë vëmendjes diplomatike. “Çdo ditë” duhet të nënkuptojë një angazhim publik të qëndrueshëm, të mbështetur me vendime, buxhete dhe llogaridhënie.
CIVIL e çon përpara këtë angazhim përmes veprimtarisë qytetare, mediave të pavarura dhe bashkëpunimit ndërkombëtar, përfshirë Nismën Globale për Mbrojtjen e Demokracisë (DDGI) dhe Aleancën e Westminsterit për Ukrainën (WA4U). Këto partneritete i forcojnë përpjekjet tona për të lidhur qëndrueshmërinë demokratike, solidaritetin me Ukrainën dhe mbrojtjen e dinjitetit njerëzor përtej kufijve.
U bëjmë thirrje institucioneve t’i kthejnë angazhimet në veprime, partnerëve ndërkombëtarë të vazhdojnë mbështetjen për punën e pavarur qytetare dhe mediatike, ndërsa qytetareve dhe qytetarëve t’u kundërvihen gënjeshtrave dhe urrejtjes që përgatisin terrenin për dhunë.
Paqja ka nevojë për të vërtetën. Paqja ka nevojë për drejtësi. Paqja ka nevojë për njerëz që refuzojnë të dorëzojnë lirinë e tyre apo të braktisin lirinë e të tjerëve.
CIVIL – Qendra për Liri
