Menjëherë pas thirrjes për tubim publik me rastin e tragjedisë në Koçan, organizuar nga nisma “Kush është i radhës?” („Кој е следен”) , ka nisur një fushatë dezinformuese kundër pjesëmarrjes së qytetarëve. Një faqe margjinale interneti , si dhe disa faqe në Facebook, u shfaqën duke pretenduar se CIVIL-i është organizator i tubimit. Kjo është gënjeshtër! Dhe aspak naive. Nuk është një gabim apo keqkuptim, por një fushatë e qëllimshme që diskrediton nismat civile dhe tenton të pengojë qytetarët të shprehin lirisht mendimin e tyre në një ngjarje publike.
FAKT: Organizator i tubimit publik më 18 mars në sheshin “Maqedonia” në Shkup, me fillim nga ora 18:00, është nisma qytetare “Kush është i radhës?”.
Ashtu si në rastin e një serie të gjatë fushatash të mëparshme të ngjashme me këtë, përhapja e kësaj gënjeshtre nuk bazohet vetëm në krijimin e konfuzionit se kush është organizatori i tubimit, por shoqërohet me narrativa manipuluese dhe gjuhë urrejtjeje që dëmton si organizatorin real ashtu edhe atë të pretenduar, dhe mbi të gjitha të drejtën e pjesëmarrjes qytetare.
Me fjalët “llum”, CIVIL-i dhe presidenti i saj Xhabir Deralla shpifet se “përpiqen sërish të përfitojnë mbi kurrizin e viktimave” dhe se “po përpiqen të manipulojnë popullin dhe të nxisin Revolucion të ri Laraman”.
Kjo gënjeshtër shpërndahet edhe përmes mesazheve private në Viber. Në mesazhin e shpërndarë në Viber, marrësit “paralajmërohen” se tubimi është organizuar nga “CIVIL-i i Xhabir Derallës” me kërcënime se janë “ të urritur për gjak”, duke u bërë thirrje qartazi njerëzve që të mos marrin pjesë në tubim.
Ky është rast i qartë i një fushate shpifjeje dhe dezinformimi, ku përmes shtrembërimit të qëllimshëm të fakteve, frikësimit dhe gjuhës së urrejtjes, ushtrohet presion dhe bëhet përpjekje e qartë për të penguar pjesëmarrjen e qytetarëve.
CIVIL-i prej vitesh punon në monitorimin e luftës kundër dezinformatave, operacioneve propagandistike dhe kërcënimeve hibride, por njëkohësisht është edhe cak i fushatave shpifëse, dezinformatave dhe narrativave të rreme, si dhe kërcënimeve me vdekje.
Përskaj sulmeve dhe kërcënimeve, CIVIL-i është një organizatë që gëzon besim dhe mbështetje të madhe nga qytetarët e Maqedonisë nga të gjitha komunitetet, dhe me nismat dhe aktivitetet e saj gëzon një reputacion të rëndësishëm rajonal dhe ndërkombëtar.
CIVIL
