Presidenti i Ukrainës, Volodymyr Zelensky, me dekretin numër 556/2023 i dha Xhabir Derallës Urdhrin e Meritës, njoftoi sot CIVILi. Me të njëjtin Dekret, Sekretari i Përgjithshëm i NATO-s, Jens Stoltenberg, si dhe aktorët me famë botërore, Alain Delon dhe Catherine Deneuve, janë vlerësuar me Urdhrin e Meritës.
Lista e fituesve të kësaj mirënjohjeje të lartë shtetërore nga Presidenti i Ukrainës, përfshin një sërë aktorësh politikë, shkencorë dhe shoqërorë nga e gjithë bota.
“Unë e perceptoj këtë njohje si një konfirmim të punës sime dhe angazhimit tim për të zbuluar të vërtetën për pasojat tragjike të agresionit brutal rus kundër Ukrainës demokratike dhe liridashëse, kundër propagandës së ashpër me dezinformata nga e cila vuan shoqëria jonë. Dua të dihet se këtë njohje të lartë dhe të çmuar e konsideroj si meritë dhe mirënjohje për të gjithë kolegët e mi në CIVIL, si organizatë civile dhe si platformë mediatike, si dhe në Frontline, ku jam redaktor. Ky nder i lartë i Presidentit të Ukrainës është merita jonë e përbashkët! Lavdi Ukrainës!”, tha Deralla para kolegiumit që u mblodh për të uruar kolegun e tij.
Më shumë detaje rreth prezantimit zyrtar të çmimit priten në fillim të nëntorit.
D. M.
