Gjendja për regjistrimin e fëmijëve në kopshte për fëmijë, si dhe nevoja që komunat dhe drejtorët në kopshte në mënyrë adekuate ta menaxhojnë procesin për pranim të fëmijëve në kopshte, që të mundësohet shfrytëzimi i tërësishëm i kapaciteteve në kopshte, ishin tema e bisedës në takimin e sotëm të ministres së Punës dhe Politikës Sociale, Jagoda Shahpaska, me përfaqësues të nënave, të cilat janë në pushim të lindjes, informojnë nga MPPS.
Në takimin, siç qëndron në kumtesë, ministrja Shahpaska informoi se Ministria e Punës dhe Politikës Sociale e ndjek gjendjen me pandeminë Kovid-19 në kopshte në nivel ditor. Ashtu, analiza tregon se vendosja në kopshte për fëmijë është e sigurtë dhe se nuk ka transmision të brendshëm të virusit, e në bazë të informatave të deritanishme, numri i fëmijëve të sëmurë është minimal dhe nuk shënon tendencë të rritjes.
“Lidhur me kërkesën për vazhdimin e pushimit të lindjes, ministrja Shahpaska informoi se duke marrë parasysh gjendjen stabile në kopshte, si dhe për shkak të faktit që të punësuarit në kopshte janë vaksinuar me prioritet, Ministria e Punës dhe Politikës Sociale ka dorëzuar letër me shkrim deri te Komisioni për mbrojtjen nga sëmundjet infektive, me të cilën propozon që të shqyrtohet mundësia për rritjen e numrit të fëmijëve në kopshte”, thuhet në njoftim.
Prej aty, shtojnë se në pajtim me Protokollin për aktivitete në institucione për kujdesje dhe edukim të fëmijëve, pas ndërprerjes së kohëzgjatjes së gjendjes së jashtëzakonshme, në këtë moment është paraparë që grupet për fëmijë deri në moshën dyvjeçare të kenë maksimum nga 12 fëmijë, ndërsa grupet për fëmijë prej 2 deri 10 vjeçarë të kenë nga maksimum 15 fëmijë.
