NATO-ja është aleancë e sigurisë, por edhe e vlerave të përbashkëta, ndërsa Republika e Maqedonisë së Veriut është një shembull që duhet ta ndjekin vendet tjera të rajonit.
Këtë e theksoi Kongresmeni amerikan dhe kryetar aktual i Asamblesë parlamentare të NATO-s, Xherald E. Konolli dje gjatë një ligjeratë onlajn para studentëve të Fakultetit për shkenca politike në Universitetin amerikan Kolexh Shkup (UAKS), dhe me këtë rast e përshëndeti anëtarësimin e Republikës së Maqedonisë së Veriut.
Siç kumtoi Universiti Amerikan Kolexh Shkup, në periudhën që vijon si sfida kryesore për SHBA-në dhe vendet e NATO-s, Kongresmeni Konolli I theksoi: përballjen me pabarazitë në shoqëri, fuqinë në rritje të Kinës dhe investimet në kërkim dhe zhvillim, infrastrukturë dhe arsim.
Duke e ndarë pikëpamjen e tij për kompetencat e ekzekutivit dhe legjislaturës sipas Kushtetutës së SHBA-së, ai theksoi se është përgjegjësi e Kongresit të ruajë rolin e tij si kontrollues në procesin e vendimmarrjes.
Studentët, theksohet, treguan interes për punën e Kongresmenit Konolli, veçanërisht në lidhje me zhvillimet aktuale në SHBA gjatë administratës së presidentit Bajden, por edhe për angazhimin e Kongresmenit Konolli si kryetar i Asamblesë Parlamentare të NATO-s .
Xherald E. Konolli e shërben mandatin e tij të shtatë në Dhomën e përfaqësuesve të SHBA-së si anëtar i vjetër i Komitetit të Mbikëqyrjes dhe Reformës, kryetar i Nënkomitetit për Aktivitetet Qeveritare dhe si anëtar i Komitetit të Punëve të Jashtme, Xherald Konolli është njohës i mirë i çështjeve të përparësisë së politikës së brendshme dhe të jashtme për SHBA-në. Ai u zgjodh kryetar i Asamblesë Parlamentare të NATO-s në 23 nëntor të vitit 2020.
Maqedonia e Veriut më 27 mars të vitit 2020 u bë anëtare e plotfuqishme e NATO-s me deponimin e instrumentit për aderim në Departamentin amerikan të shtetit në Uashington.
