Nën moton “Vaksinat na afrojnë” sot fillon shënimi i Javës Evropiane të Imunizimit.
Në fillim të Javës Evropiane të Imunizimit, Ministria e Shëndetësisë dhe zyrat e Organizatës Botërore të Shëndetësisë (OBSH) dhe Fondi i Fëmijëve i Kombeve të Bashkuara (UNICEF) në Maqedoninë e Veriut theksojnë se vaksinimi është një e mirë publike që ndihmon shoqërinë, mbron shëndetin e popullatës dhe shpëtohen jetë njerëzish.
Përmes shënimit të sivjetshëm të Javës Evropiane të Imunizimit në Maqedoninë e Veriut, Ministria e Shëndetësisë dhe partnerët dëshirojnë të rrisin vetëdijen për vlerën e imunizimit, duke theksuar rëndësinë e imunizimit rutinë dhe nevojën për të fituar besimin e opinionit në sigurinë dhe efikasitetin e vaksinave kundër KOVID -19, ndër të tjera për mbrojtjen e profesionistëve shëndetësorë dhe përfundimin e pandemisë.
“Masat e shëndetit publik dhe masat sociale ndihmojnë për të ngadalësuar përhapjen e virusit, por vaksinimi kundër KOVID-19 është një mjet jetësor për t’i dhënë fund pandemisë dhe në këtë kontekst ne po bëjmë çdo përpjekje për të siguruar vaksina për të gjithë popullatën”, citon ministri i Shëndetësisë, Venko Filipçe.
Ai tregon se për tërë kohëzgjatjen e epidemisë, po bëhen përpjekje të mëdha për të ekuilibruar mbajtjen e shërbimeve thelbësore të imunizimit për të gjitha moshat, nga njëra anë, duke përdorur të gjitha potencialet e disponueshme profesionale, burimet dhe kapacitetet e provuara tashmë të shtetit për zbatimin e vaksinimit dhe vetë realizimin e vaksinimit kundër KOVID-19 në një mënyrë të sigurt. Përpjekjet në planin e imunizimit, deklaron Filipçe, përfshijnë bashkëpunimin e partneritetit me UNICEF-in dhe OBSH-në në fushat e përgatitjes së një plani kombëtar të vaksinimit për KOVID-19 dhe tejkalimin e sfidave në lidhje me sigurimin e vaksinave dhe ruajtjen e tyre dhe logjistikën tjetër, falë të cilave është krijuar një zinxhir funksional furnizimi për vaksinat në vend dhe nëpunës shëndetësorë dhe vaksinues të trajnuar.
Imunizimi është iniciativa kryesore e Programit të Punës të Zyrës së OBSH-së për Evropën për periudhën 2020-2025 me titull “Aksion i bashkuar për një shëndet më të mirë në Evropë” – shpjegon Dr. Zhihan Tavila, përfaqësues i OBSH-së në Maqedoninë e Veriut.
“Si një nga mënyrat më të provuara ekonomike për të mbrojtur shëndetin, imunizimi është i dobishëm për të gjithë, kudo në botë. Vaksinat janë një e mirë publike kolektive, kështu që barazi duhet të sigurohet për të gjithë njerëzit lidhur me aksesin e tyre dhe përfitimet nga vaksinat. Nëse imunizimi rutinë neglizhohet për shkak të gjendjes me KOVID-19, pasojat do të ndihen edhe shumë kohë pasi të ketë mbaruar pandemia. Falë vite e vite pune të palodhur për të siguruar që të gjithë njerëzit të mbrohen përmes vaksinimit, ne po i afrohemi eliminimit të disa sëmundjeve të tilla si fruthi, por për të mbrojtur këtë progres me çdo kusht duhet të mbahet përfshirje e lartë e mbulimit të imunizimit përmes vaksinimit rutinë. Në mes të pandemisë KOVID-19, vaksinimi paraqet një intervenim shumë të rëndësishëm për t’i dhënë fund pandemisë, pas së cilës më në fund do të jemi në gjendje të jemi më pranë njëri-tjetrit,” tha Tavila.
Patricia Di Xhovani, përfaqësuesja e UNICEF-it në vend, thotë se pas një viti të mbylljes, klasave bosh dhe tubimeve familjare të anuluara, njerëzit në të gjithë botën kanë filluar të marrin vaksinën KOVID-19 ose po presin atë moment.
“Të gjithë e dimë se vaksinat kundër KOVID-19 janë shpresa më e madhe që kemi se jeta jonë normale do të kthehet dhe se do të jemi përsëri në gjendje të jemi pranë njëri-tjetrit. “Ato janë gjithashtu një kujtesë e rëndësishme e rolit kritik që luajnë vaksinat e tjera, përfshirë vaksinat rutinë për fëmijët, që na mundësojnë të funksionojmë çdo ditë,” tha Di Xhovani.
Ministria e Shëndetësisë dhe zyrat e Organizatës Botërore të Shëndetësisë (OBSH) dhe Fondit të Fëmijëve të Kombeve të Bashkuara (UNICEF) në një deklaratë të përbashkët me rastin e Javës Evropiane të Imunizimit, theksojnë se KOVID19 ndërpreu një numër shërbimesh, kështu që ndërsa nga njëra anë ne jemi dëshmitarë të kërkesës së zvogëluar për shërbime për fëmijët në fushën e diagnostikimit, trajtimit të sëmundjeve kronike dhe kujdesit primar shëndetësor, për shkak të frikës së prindërve se fëmijët mund të infektohen me KOVID-19, ajo që gëzon është fakti se interesi për imunizimin rutinë të fëmijëve dhe zbatimin e tij kanë mbetur kryesisht të pandryshuara.
Keqinformimi dhe dezinformimi mund të shkaktojnë hezitim të vaksinës duke u bërë kështu pengesë në rrugën e përgjigjes së dëshiruar efektive të vaksinës ndaj pandemisë. Në luftën kundër KOVID-19, partnerët gjithashtu bëjnë thirrje për një angazhim më të madh në sigurimin e qytetarëve me informacion dhe këshilla nga burime të besueshme. Komunikimet e hapura dhe objektive i ndihmojnë njerëzit të marrin vendime të bazuara në mirëinformimin e tyre, si dhe të kuptojnë rëndësinë e vaksinimit si mënyra më efektive – së bashku me masa të tilla si identifikimi i kontakteve të të infektuarve, ruajtja e distancës fizike, mbajtja e maskës dhe larja e duarve – për t’i dhënë fund pandemisë.
