Procesi i numërimit të votave po vijon në të gjithë vendin. Deri në këto momente, janë numëruar në rang vendi 31% e kutive të votimit, ku PS-ja është në avantazh, PD në rritje, ndërsa LSI-ja në rënie.
Nga rezultatet e deritanishme kryeson Partia Socialiste me 49.55%, PD me 38.71, LSI 7.14%.
Socialistët, deri më tani, janë forcë e parë në 9 qarqe, përfshirë edhe Dibrën, ndërsa PD-ja ruan bastionet e saj në Shkodër, Kukës dhe Lezhë.
Nga kutitë e numëruara, deri më tani, në 1614 qendra votimi nga 5199 në total, 24 271 vota rezultojnë të pavlefshme dhe 448 589 të vlefshme.
Është mbyllur procesi i numërimit të votave në Memaliaj, ku Partia Socialiste rezulton fituese me 3271 vota. PD 1404 dhe LSI 1000 vota, ndërsa 391 vota janë shpallur të pavlefshme
Po kështu edhe në Poliçan është mbyllur procesi i numërimit. Edhe këtu fituese ka dalë Partia Socialiste me 3877 vota, PD 1009 dhe LSI 794.
Numërimi i kutive të votimit ka përfunduar edhe në Përmet, ku sërish Partia Socialiste ka dalë fituese me 3466 vota, PD ka marrë 1939 vota dhe LSI, 527 vota.
Mëngjesin e sotëm u publikua rezultati i parë i zgjedhjeve nga njësia 10, ku u aplikua votimi dhe numërimi elektronik. Në këtë njësi, PS-ja doli fituese me 6007 vota, ndjekur nga PD-ja me 4550 dhe më pas LSI-ja me 628, ndërsa PSD-ja ka marrë 208 vota.
