Pikërisht në ditën e jurisprudencës së Maqedonisë erdhi Raporti pozitiv për gjendjet me të drejtat e njeriut të Departamentit amerikan të shtetit, në të cilin është konstatuar se Qeveria ka dëshmuar respekt serioz ndaj pavarësisë së gjyqësisë dhe paanshmëri në raport me vitet e kaluara, thotë kryeministri Zoran Zaev në mesazhin e dërguar deri tek të gjithë gjykatësit dhe prokurorët, avokatët dhe të gjithë të punësuarit e tjerë në sistemin juridik me rastin e Ditës së jurisprudencës.
“Kjo është edhe një dëshmi se atë që jemi duke e bërë po i jep rezultatet dhe se reformat në gjyqësi mbeten prioritet i lartë i ynë. Jemi duke ua kthyer besimin qytetarëve në sistemin gjyqësor. Sistem i cili realizon drejtësinë. Kontribut të madh për këtë përfitim japin edhe vetë gjykatësit të cilët para Këshillit gjykues filluan me kontrollin dinamik të punës së gjykatësve dhe ky proces tashmë është duke i dhënë rezultatet”, thotë Zaev.
Sfidë prioritare gjatë periudhës së ardhshme, siç thekson kryeministri është vendosja e teknologjisë informatike bashkëkohore në punën dhe digjitalizimin e gjykatave të vendit.
“Për këtë qëllim parashihet modernizimi i mbi 100 sallave gjyqësore në shtet, për realizimin e këtij prioriteti Qeveria i siguron të gjitha kushtet”, shton Zaev.
Kryeministri në mesazhin për të gjithë gjykatësit dhe prokurorët, avokatët dhe të gjithë të punësuarit e tjerë në sektorin juridik u dëshiroi sukses në realizimin e obligimeve të tyre profesionale, të cilat, siç thotë, vetvetiu janë kontribut për përforcimin e shtetit ligjor, si edhe pjesëmarrje në misionin tonë të përbashkët për t’i zhvilluar të drejtat e njeriut, të ndërtojmë sistem gjyqësor të pavarur dhe të paanshëm të bazuar në vlerat evropiane.