Opozita shqiptare sot ishte thirrur në takim që të dakordohemi për tema të ndryshme dhe ata nuk pranuan të mbajnë mbledhje të tillë. Qëllimi i tyre si duket është vetëm të bllokojnë, ndërsa jo të kontribuojnë në masat e tilla.
Këtë e deklaroi ministri i Ekonomisë nga rradhët e BDI-së Kreshnik Bekteshi në konferencën për shtyp duke u përgjigjur në pyetjen e gazetarëve.
“Opozita e Maqedonisë tashmë i mbështet ligjet nga pakoja e pestë e masave ekonomike. Sa i përket opozitës shqiptare sot u kemi bërë thirrje të dakordohemi për tema të ndryshme dhe ata nuk pranuan të kenë mbledhje të tillë dhe si duket qëllimi i tyre është vetëm të bllokojnë, ndërsa jo të kontribuojnë për masa të tilla”, theksoi Bekteshi.
Ka apeluar sot edhe njëherë të gjejnë forcë t’i votojnë ato vendime ligjore ose të propozojnë përmirësim të atyre vendimeve.
Në lidhje me afatet që dalin nga vendimet ligjore prej pakos së pestë të masave, tha se si Qeveri mund të intervenojnë në suaza të komisioneve kuvendore dhe të propozohen me qëllim që të gjitha kompanitë dhe punëtorët në sektorin privat të marrin paga edhe për shkurtin.
Bashkimi Demokratik për Integrim në mëngjes paralajmëroi takim të sekretarit Artan Grubi me sekretarët e BESËS, PDSH-së, Aleancës për Shqiptarët dhe Alternativës në lidhje me regjistrimin. Por, vetëm një orë më vonë nga BDI-ja informuan se takimi anulohet për shkak të, moskonfirmimit të pranisë nga ana e partive politike opozitare, Aleanca për Shqiptarët dhe Alternativa.
