Qeveria mbetet e përkushtuar në zbatimin e reformave kryesore të përshkruara në Raportin e Komisionit Evropian për vitin 2020 dhe organizimin e dialogut efektiv të pranimit me Bashkimin Evropian. Procesi i integrimit në BE mbetet përparësi strategjike për zhvillimin, stabilitetin dhe prosperitetin e vendit dhe ne mbetemi të përkushtuar ndaj këtij procesi, tha ministri i Shoqërisë Informatike dhe Administratës Jeton Shaqiri në fjalën e tij hyrëse në takimin e sotëm të 17-të të Nënkomitetit për inovacione, shoqëri informatike dhe politikë sociale në Komisionin Evropian.
Shaqiri, i cili u drejtua si bashkëkryetar, theksoi angazhimin e vendit për të përmbushur të gjitha detyrat në korniza të Nënkomitetit, pavarësisht nga të gjitha sfidat që lidhen me pandeminë.
Sipas tij, është me rëndësi të veçantë mbajtja e dialogut të rregullt me Komisionin Evropian në korniza të Marrëveshjes së Stabilizim-Asociimit.
“Ky Nënkomitet paraqet forum thelbësor për krijimin dhe promovimin e dialogut të vazhdueshëm në fusha të rëndësishme, të tilla si arsimi dhe kultura, shoqëria informatike dhe mediat, politika sociale dhe punësimi, si dhe shkenca dhe hulumtimi”, tha Shaqiri.
Në takim u diskutuan, ndër të tjera, progresi në lidhje me rekomandimet e Raportit për vitin 2020, si dhe zbatimin e konkluzioneve të Nënkomitetit të vitit 2020.
Nënkomiteti për inovacion, shoqëri informatike dhe politikë sociale është një nga organet e dialogut në mes Republikës së Maqedonisë të Veriut dhe Bashkimit Evropian, i themeluar në korniza të Komitetit për Stabilizim-Asociim.
