Njëzet aplikacione janë dorëzuar për pjesëmarrje në tenderin për ndërtimin e dy akseve të para të hekurudhës drejt Bullgarisë, që e publikoi Banka Evropiane për Ripërtëritje dhe Zhvillim.
Tetë prej aplikacioneve janë për aksin e parë Kumanovë – Bellakovc, ndërsa 12 për të dytin, Bellakovc – Kriva Pallankë. Bëhet fjalë për konzorcium ndërkombëtar, deklaroi për MIA-n, Hari Llokvenc, drejtor i Hekurudhave të Maqedonisë Infrastruktura.
Vijon vlerësimi i dokumentacionit të dorëzuar, pas çka pritet nga fundi i muajit të finalizohet lista me pjesëmarrësit të cilët i plotësojnë kushtet dhe do të mund të marrin pjesë në fazën e dytë të tenderit me dorëzimin e ofertës finale. Periudha e dorëzimit të ofertës finale do të zgjasë tre muaj, pas çka do të pasojë përzgjedhja e zbatuesit dhe starti i punimeve, që, sipas vlerësimit të udhëheqësisë së HM Infrastruktura, pritet të jetë në fillim të gjysmës së parë të vitit.
Në aksin e parë në gjatësi prej 31 kilometrash kanë përfunduar 54 për qind të punimeve ndërtimore, të cilat u ndërprenë pasi “Vibe” gjerman në mënyrë të njëanshme e shkëputi Marrëveshjen për zbatim. Aksi i dytë është në gjatësi prej 34 kilometrash. Për të dy akset ka përfunduar konstruksioni financiar, ndërsa për të tretin nga Kriva Pallanka deri në kufirin me Bullgarinë që është në gjatësi prej 24 kilometrash, deri më tani janë siguruar 60 milionë euro dhe është duke u punuar në sigurimin e financave të tjera të nevojshme.
Është paraparë edhe faza e parë edhe e dytë të realizohen në afat prej 36 muajsh.
