Donacion në vlerë prej 16 mijë euro nga Gjermania sot është dorëzuar në poliklinikën në Shuto Orizarë. Është bërë furnizim me pajisje dhe materiale mjekësore, ndërsa një pjesë e donacionit janë edhe pajisjet personale mbrojtëse dhe maskat me oksigjen.
Për ministrin e Shëndetësisë, Venko Filipçe, donacioni është i rëndësishëm sepse janë siguruar pajisje me të cilat do të rritet qasja dhe cilësia e mbrojtjes shëndetësore të qytetarëve të Shuto Orizarës.
“Në këtë poliklinikë kanë qasje qytetarë të kategorive shumë të ndjeshme. Gjatë periudhës së kaluar intensivisht kemi punuar dhe pas një periudhe të gjatë kohore, e zgjodhëm edhe krizën me gjetjen e gjinekologut. Në këtë moment po vijon procedura për furnizim me pajisje me të cilat do të pajiset kjo ordinancë kështu që përfundimisht do të kemi në dispozicion gjinekolog në këtë poliklinikë”, deklaroi Filipçe gjatë dorëzim-pranimit të donacionit.
Paralajmëroi edhe rinovim të poliklinikës në fillim të vitit të ardhshëm, ndërsa në kuadër të institucionit është hapur edhe qendër për teste të shpejta dhe ka shërbim kujdestar dhe laborator.
Donacioni nga Gjermania është me iniciativë të Qeverisë federale gjatë presidencës gjermane me Këshillin e Bashkimit Evropian.
Ambasadorja gjermane në vend Anke Hollshtajn theksoi se Gjermania deri më tani e ka mbështetur rajonin e Ballkanit Perëndimor me 15 milionë euro, ndërsa Bashkimin Evropian me tre miliardë euro në të cilat Gjermania merr pjesë me gati një të tretën.
“Duke pasur parasysh situatën, theks i veçantë i presidencës sonë ishte përballja me pandeminë dhe pasojat e saj. Këtu në rajonin e Ballkanit Perëndimor kemi partnerë të cilët gjatë luftës me pandeminë mund të mbështeten te ne”, tha Hollshtajn, duke dëshiruar rimëkëmbje të shpejtë të të gjithë qytetarëve të cilët luftojnë me virusin.
