Kjo qeveri prej kur ishte në opozitë slloganin kryesor e kishte “pa drejtësi nuk ka qetësi” dhe “rroga 500 euro”, si duket drejtësia ka dështuar moti, kurse rroga vazhdon të vend numërojë.
Drejtësia ka dështuar me rastin e deputetëve të amnistuar të opozitës, me rastin e “arratisjes” së ish kryeministrit dhe rastin e ikjes së dy agjentëve të shërbimit sekret.
Rasti më i fundit ai i marrjes së imunitetit të deputetit Trajko tregon se kjo qeveri bashkë me opozitën vazhdojnë të luajnë ping pong, kurse popullin e motivojnë që sa më shumë të luaj Ludo.
Populli luan Ludo sepse ping pongun nuk e ka sport shumë për zemre.
Pastaj kur je në pritje të rrogës që të bëhet 500 euro, Ludo-ja shkon rrëke; disa orë luajmë Ludo, pastaj disa orë hyjmë në komente të ndryshme kundër ping pongut të qeverisë me opozitën, kështu na vjen gjumi, për tu zgjuar të nesërmen me shpresë se rroga do të bëhet 500 euro, kurse gjashta do të na bjen më shpesh në Ludo, derisa ata vazhdojnë me të tyren, ne do të vazhdojmë me tonën, ta shohim kush do të na vij më shpejt rroga 500 euro, apo gjashta e Ludos, edhe pse për të parën jemi shumë skeptik.
Derisa vazhdojnë të luajnë ping pong, mirë është që parlamentit t’i vendosin një shenjë minus 12, sepse më shumë ngjanë si çerdhe fëmijës apo si foshnjore se sa një institucion ligjvënës.
