Ministri i Punëve të Jashtme të Serbisë, Ivica Daçiq, ka deklaruar sot se Serbia nuk do ta njohë Kosovën me asnjë çmim dhe se Serbia dëshiron të arrijë një kompromis për Kosovën.
“Nuk do ta njohim Kosovën për asnjë çmim, sepse nuk bëhet fjalë për BE-në apo Kosovën. Ne nuk duam të na shtrohet ashtu pyetja. Duam zgjidhje paqësore, por jo poshtërimin e Serbisë”, tha Daçiq, shkruan Danas, transmeton Lajmi.net.
Ai, po ashtu, ka thënë se qëllimi strategjik i Serbisë është anëtarësimi në BE, por nuk mund të hyjë derisa të arrijnë një marrëveshje ligjërisht detyruese me Kosovën, duke pyetur nëse dikush në BE e di se çfarë duhet të shkruhet në atë marrëveshje dhe nëse kjo do të thotë se Serbia duhet ta njohë Kosovën.
Sipas tij, BE-ja aktualisht ka probleme më të mëdha sesa anëtarësimi i vendeve të Ballkanit Perëndimor, por BE-ja është një projekt i mirë për Serbinë.
Daçiq tha se stabiliteti rajonal është i rëndësishëm për stabilitetin e Evropës dhe për këtë arsye duhet të kërkohen kompromise, e jo të pranojnë akte të njëanshme.
Burimi: GazetaExpress
