Me transmetimin e video incizimeve dhe fotografive nga ngjarjet e 27 prillit të vitit të kaluar, sot në Gjykatën Penale në Shkup, pikërisht në përvjetorin e ngjarjeve trishtuese në Parlamentin e Maqedonisë, vazhdoi gjykimi për sulmin ndaj deputetit Ziadin Sela, në të cilin në bankën e të akuzuarve gjenden dhjetë persona.
Kryetarja e këshillit gjyqësor është gjykatësja Sllavica Andreevska, ndërsa aktakuzën e përfaqëson prokuroi publik Darko Jakimovski.
Të gjithë të akuzuarit paradite janë sjellë nga paraburgimi, ndërsa seanca vazhdoi me dhënien e dëshmive materiale.
Avokati Abedin Abdulli, ndihmës i të dëmtuarit Zijadin Sela, në gjykatë deklaroi se klienti i tij ka përgatitur kopje nga dokumentacioni mjekësor dhe i ka dorëzuar në gjykatë.
Mbrojtja e pranoi propozimin e PTHP-së që të mos shihen të gjitha incizimet nga lista e propozuar e dëshmive, sepse disa përsëriten dhe prandaj të lëshohen vetëm disa pjesë, para së gjithash,me qëllim që procesi gjyqësor të jetë më ekonomik.
Tërheqjen e një pjese të incizimeve në seancën e fundit e kërkoi Prokuroria për shkak të përsëritjeve të tyre.
Për tentimin për vrasjen e Ziadin Selës më 27 prill të vitit të kaluar akuzohen Kire dhe Ceko Gjorgjievski, Oliver Oshavkovski, Sasha Cenkov, Nikollçe Dimitrievski, Aleksandar Janevski-Toshta, Andrej Micov, Nikolla Vojminovski, Kosta Delov dhe Stojan Pavlovski-Kobra. Të akuzuarit për tentim vrasje të deputetit Ziadin Sela në seancat paraprake u prononcuan të pafajshëm.
Burimi: MIA
