Gjatë kohës së fushatës parazgjedhore për zgjedhjet lokale, kryetarja e komunës së Tetovës, Teuta Arifi, disa herë ka potencuar që për shkak të pastrimit të deponive nuk kanë arritur që t’i kushtojnë vëmendje pastrimit të lumit Shkumbin.
Gjegjësisht, ashtu siç lajmërojnë nga Shoqata “Eco Guerilla”, shtrati i Shkumbinit shfrytëzohet si vend i qëlluar për të hedhur mbeturina ndërtimi, orendi shtëpiake, fekale nga gropat septike, ndërsa si depo e shfrytëzon edhe Ndërmarrja Publike Komunale.
“Papastërtitë në lumin Shkumbin janë problem i madh për banorët e Tetovës. Shpesh herë mund të shihet se si mbeturinat lundrojnë mbi ujë dhe me atë e ndotë lumin. Besojmë që këto fenomene duhet të dënohen nga kompetentët dhe mos të përsëritet e njëjta”, deklaroi Arianit Xhaferi për CIVIL Media.
Në faqen e tyre të fejsbukut, Eco Guerilla ka publikuar video, ku shihet se si Ndërmarrja komunale hedh mbeturina në lumin Shkumbin, me komentim: “jo që nuk pastrohet lumi, por në të edhe më tepër ndotet edhe atë nga të punësuarit e N.P. Higjiena Komunale”.
V.M.
