Me qëllim për të ndërtuar koalicione për përgatitjen e “Planit të veprimit për partneritet të hapur qeveritar – PHQ 2016 – 2018”, sot në Shkup u mbajt punëtoria e parë me temë – transparenca dhe llogaridhënia.
Punëtoria i ishte përkushtuar identifikimit të angazhimeve dhe masave, të cilat do të promovojnë përfshirje më të madhe të qytetarëve në krijimin e politikave, në transparencën fiskale të buxhetit kombëtar, më shumë kontroll mbi ndihmat/donacionet ndërkombëtare, për prokurimet publike transparente, monitorim sistematik dhe vlerësimin të politikave të qeverisë, për parandalimin e korrupsionit, ndërtimin e sistemeve të integritetit, si dhe për menaxhimin e konflikteve të interesit.
Në punëtori, krahas Marija Risteskës, drejtoreshës ekzekutive të Qendrës për Hulumtim dhe Krijim të Politikave – QHKP, pjesëmarrësve iu drejtuan edhe Sanja Stefanovska – Trajanoska dhe Sandra Ismanovski nga UNDP, të cilat folën për objektivat e zhvillimit të qëndrueshëm dhe PHQ si një platformë për arritjen e tyre.
Për përvojat dhe leksionet nga Plani i Veprimit të PHQ 2014-2016, si dhe për mënyrat për masa më inovative, foli Gordana Galiq – Dimitrovska, koordinatore kombëtare e PHQ.
Gjatë muajit mars, parashihet të mbahen edhe dy punëtori – “Liria e informacionit dhe të dhënat e hapura” dhe “Shërbime efektive publike dhe qeverisja e mirë në nivel lokal”.
Kjo ngjarje është mbështetur nga UNDP – Programi i Kombeve të Bashkuara për Zhvillim, në kuadër të projektit të financuar nga Bashkimi Evropian: “Avokimi për qeveri të hapur: Përcaktimi i agjendës së shoqërisë civile dhe monitorimi i planeve qeveritare të veprimit”.
