E kemi bërë iniciativën më të mirë, e cila do ta ndryshojë fytyrën e Ballkanit, nga emri i të cilit nuk turpërohemi dhe e cila do të sjellë shumë të mira për qytetarët, deklaroi sot në Tiranë presidenti serb Aleksandar Vuçiq pas Samitit të Ballkanit të Hapur, njofton korrespondenti i MIA-s nga Beogradi.
Në konferencën për shtyp së bashku me kryeministrat e Maqedonisë së Veriut dhe Shqipërisë, Zoran Zaev dhe Edi Rama, Vuçiq theksoi se është e rëndësishme për pjesëmarrësit që të vazhdojnë të punojnë për të gjitha çështjet dhe në këtë mënyrë të hiqen taksat dhe ndoshta një ditë të krijohet bashkim doganor, të fshihen kufijtë mes nesh, si dhe të tërhiqen më shumë investitorë së bashku.
Vuçiq tha se kur mbërriti në Tiranë pa që kryeministri i Shqipërisë po sulmohej, se Ballkani i Hapur ishte një nismë që synonte krijimin e Serbisë së Madhe. Vuçiq porositi se kjo iniciativë flet se si prodhuesit tanë bujqësor dhe industrial, por mbi të gjitha qytetarët e të trija vendeve mund të jetojnë më mirë në të ardhmen dhe të kenë më shumë turistë.
“Duke ardhur në Tiranë dhe duke folur tani në emër të të gjithë qytetarëve të Serbisë, erdha për të respektuar çdo person në Shqipëri dhe Maqedoninë e Veriut. Të them se të gjithë janë gjithmonë të mirëpritur në Serbi, se Serbia është një shtëpi e dytë për ta, siç duhet të ndihemi të mirëpritur në Shkup dhe Tiranë”, tha Vuçiq.
Ai u shpreh i kënaqur për marrëveshjet e nënshkruara në Samit, duke thënë se është diçka që është diskutuar për dy vite dhe nuk mund të arrihet për shkak të procedurave të panumërta burokratike. Vuçiq theksoi se në çdo takim është rënë dakord që të përsëritet ftesa për të tjerët në rajon – Sarajevë, Podgoricë dhe Prishtinë, për t’iu bashkuar nismës dhe shtoi se do të diskutohet gjithashtu se si të ofrohen më shumë zbritje në hotele dhe restorante për qytetarët e tri vendeve.
