Në këtë moment po i bëjmë të gjitha parakushtet dhe kur do të kemi parametra më të saktë dhe preciz në lidhje me ndërtimin e rrugës nga Tetova për në Prizren se sa do të kushtonte, a do të ishte fitimprurëse dhe ku do të gjenden mjetet financiare, ne do të vazhdojmë me të gjitha procedurat e tjera, paralajmëroi ministri i Transportit dhe Lidhjeve Bllagoj Boçvarski.
”Për ne si Qeveri, është thelbësore që studimet për përfitimin dhe ndikimin në mjedis të tregojnë vlerësime pozitive dhe pastaj të fillojmë me përgatitjen e një projekti themelor për lidhjen e Tetovës dhe Prizrenit. Por, derisa të marrim vlerësime pozitive nga studimet dhe parakushtet, ne nuk do të fillojmë të bëjmë projektin bazë. Ka zgjidhje konceptuale. Ne gjithashtu biseduam me ministrin e Transportit dhe Lidhjeve nga Kosova për këtë çështje që është e rëndësishme për të dy rajonet për lidhjen e qytetarëve”, tha Boçvarski në përgjigje të pyetjes së gazetarit gjatë inspektimit të sotëm të rindërtimit të rrugës “Goce Delçev” në Tetovë e cila po zbatohet në kuadër të projektit “Ndërlidhja me rrugët lokale”.
Ai specifikoi se për të shkarkuar komunikacionin në hyrje të qytetit përmes Ndërmarrjes Publike për rrugët shtetërore, tanimë po projektohet unaza rreth Tetovës dhe po punohet në rrugën Tetovë – Jazhincë deri në pikën aktuale të kufirit, e cila, siç tha ai, do të japë kontribut të plotë në përmirësimin e infrastrukturës përreth Tetovës.
