Regjistrimi i popullsisë, amvisërive dhe apartamenteve në vend do të kryhet në prill, thonë nga Qeveria, duke njoftuar se faza e parë e regjistrimit do të fillojë për më pak se një javë. Regjistrimi do të zbatohet në periudhën nga 1 prilli deri më 21 prill të këtij viti, dhe momenti kritik për këtë operacion statistikor do të jetë në mesnatën në mes 31 marsit dhe 1 prillit.
Regjistrimi përfundimisht do të kryhet në prill, tha dje në një konferencë për shtyp zëdhënësi i Qeverisë, Dushko Arsovski.
“Ai është i nevojshëm për shtetin. Çdo qytetar duhet të kontribuojë në zbatimin e këtij operacioni të rëndësishëm statistikor që do të sigurojë të dhëna të rëndësishme për hartimin e planeve strategjike për zhvillimin e mëtejshëm të vendit. Metodologjia është përcaktuar, të gjitha përgatitjet janë në vijim e sipër. Regjistrimi i popullsisë jo-rezidente fillon nga data 1, kështu që ajo që është e sigurt është se ky operacion statistikor do të kryhet”, tha Arsovski duke iu përgjigjur pyetjes së një gazetari.
Për më pak se një javë fillon faza e parë nga regjistrimi i popullatës, paralajmëroi ministri i Drejtësisë, Bojan Mariçiq, pasi dje në mëngjes u informua nga Enti shtetëror për statistikë se përgaditjet për regjistrim po zhvillohen në rendin më të mirë.
“Nga Enti shtetëror për statistikë në mëngjes na informuan se përgatitjet për regjistrim po zhvillohen në rendin më të mirë. Për më pak se një javë fillon faza e parë e regjistrimit të popullatës. Ajo që është shumë me rëndësi është se ‘Eurostat’ edhe drejtpërdrejtë konfirmoi se Ligji për regjistrim dhe metodologjia janë në harmonizim me legjislaturën e BE-së, respektivisht starndardet më të larta për zbatimin e një operacioni të tillë statistikor”, ka shkruar në Fejsbuk ministri Mariçiq.
Ai vlerëson se pas kësaj duhet të ndërpriten të gjitha tentimet destruktive për sabotim të regjistrimit.
“Nevojitet të bashkohemi dhe më në fund të fillojmë bashkarisht të punojmë për të mirën e shtetit. Apeloj që të gjithë faktorët energjinë e tyre politike ta konsumojnë në zhvillimin dhe prosperitetin e vendit. Këtë ua kemi borxh qytetarëve”, ka shkruar Mariçiq në Fejsbuk.
Enti Shtetëror i Statistikës pardje e shpalli konkursin publik për angazhimin e regjistruesve rajonal dhe instruktorëve rajonal për të marrë pjesë në implementim mbi regjistrimin e popullsisë, amvisërive dhe apartamenteve në periudhën nga 1 prilli deri më 21 prill të këtij viti. Kushti kryesor është që ata të mos jenë të punësuar dhe të kenë përfunduar arsimin e mesëm.
Enti i Statistikës do të zgjedhë 5.055 regjistrues dhe 506 instruktorë rajonal nga aplikantët, të cilët do të trajnohen në mars për të filluar aplikimin e regjistrimit, ndërsa trajnimet do të kryhen nga 150 instruktorë shtetërorë të cilët do të jenë të parët që do t’i nënshtrohen trajnimit javën e ardhshme.
Sipas Entit të Statistikës, protokollet e përshkruara shëndetësore do të ndiqen, dhe do të ishte mirë nëse të gjithë instruktorët dhe regjistruesit do të ishin në grupin prioritar për vaksinimin. Regjistruesit do të marrin maska mbrojtëse dhe pajisje të tjera mbrojtëse, ndërsa personat e sëmurë dhe të izoluar do të hyjnë me pallto dhe vizirë, sipas protokolleve të sigurisë.
Drejtori i Entit, Apostoll Simovski, thotë se momenti kritik për regjistrimin do të jetë në mesnatë në mes 31 marsit dhe 1 prillit. Kjo do të thotë që qytetarët e vdekur dhe foshnjat e lindura pas këtij momenti kritik nuk do të përfshihen në statistikë. Familjet ose të afërmit e ngushtë do të duhet të japin informacione rreth anëtarit të vdekur nëse ai ose ajo vdiq pas momentit kritik, por para se regjistruesit të mbërrijnë në shtëpinë e tyre.
“Ne kemi moment kritik dhe e shohim situatën që nga ajo datë. Nëse personi ishte gjallë deri në atë moment, por vdiq para se të mbërrinin regjistruesit, atëherë ai person do të numërohet dhe ne do të marrim informacione për atë person. Nga ana tjetër, nëse një foshnje lind pas momentit kritik, atëherë kjo foshnje nuk do të hyjë në statistikë. Kjo është bërë për të përcaktuar gjendjen e saktë deri në një datë të caktuar. Ai moment është mesnatë në mes 31 marsit dhe 1 prillit, kështu që të gjitha të dhënat mblidhen vetëm deri në atë ditë. Kur ju pyesim nëse keni punuar për honorar shtesë gjatë javës së kaluar, atëherë kemi parasysh javën e fundit të marsit, megjithëse regjistruesit mund të arrijnë në shtëpi më 15 prill, për shembull”, shpjegoi Simovski për “Plusinfo”.
Përgatitjet për zbatimin e regjistrimit janë duke vazhduar dhe asnjë problem nuk është paraqitur deri më tani. Vetëregjistrimi fillon më 1 mars, si dhe regjistrimi i personave në Armatë dhe në misionet diplomatike-konsullore. Trajnimet për regjistruesit fillojnë më 15 mars.
