Qeveria në seancën e nesërme do të shqyrtojë propozimin për shkarkimin e drejtorit të Byrosë për Siguri Publike (BSP) Llazo Vellkovski që e ishte ngritur nga ministri i Punëve të Brendshme Oliver Spasovski pasi u konfirmua se Vellkovski veturën zyrtare e ka përdorur për transport të anëtarëve të familjes së tij jashtë Maqedonisë.
Për pasardhësin e tij të mundshëm do të bisedohet më tutje, ka informuar sot kryeministri Zoran Zaev pas panelit që sot në Klubin e deputetëve u mbajt në nder të 17 vjetorit të nënshkrimit të Marrëveshjes së Ohrit.
“Emra për trashëgimtar të tij ende nuk kemi, nuk kemi menduar, pasi nuk shpresojmë se do të ndodhë një gabim i tillë. Do të na duhet kohë të gjejmë zgjidhje të duhur”, ka thënë Zaev.
Ai ka shtuar se Vellkovski është një nga bashkëpunëtorët e tij të parë, por beson se ai edhe më tej do të jetë partner i rëndësishëm në MPB, pasi është njeri me peshë me përvojën që ka.
Lidhur me atë nëse shkarkimi i Vellkovskit dhe mospranimi i dorëheqjes i zëvendëskryeministrit për çështje ekonomike Koço Angushev paraqet pranim të arshinëve të dyfishta, Zaev ka thënë se në rastin me Vellkovskin gabimi është konstatuar dhe vërtetuar.
“Në lidhje me grantet e Fondit për inovacion secili sipas ligjit të RM-së ka të drejtë të aplikojë. Nuk ka gabim konform ligjit. Ligji njëjtë vlen për të gjithë. Nëse dikush gabon para ligjit, duhet të përgjigjet. Nëse dikush ka bërë gabim dhe nga aspekti teknik duhet të bart përgjegjësi”, ka thënë Zaev. (MIA)
