Kryeministri Zoran Zaev sot u takua me Jacek Mulltanovski, ambasadori i Republikës së Polonisë në Maqedoni, i të cilit i përfundon mandati në vend.
Duke shprehur falënderim për angazhimin dhe mbështetjen e ambasadorit Mulltanovski, Zaev e theksoi kontributin e Polonisë për proceset demokratike në Maqedoni, në rrugën drejt realizimit të qëllimeve euro-integruese të shtetit, njoftoi pres-shërbimi qeveritar.
Në takim, të dy bashkëbiseduesit theksuan se Polonia dhe Maqedonia si vende miqësore u janë përkushtuar thellimit të bashkëpunimit bilateral në të gjithë sferat dhe konkluduan se kjo është bazë e mirë për intensifikimin e marrëdhënieve, posaçërisht në sferën e ekonomisë, sigurisë, kulturës, turizmit dhe sfera të tjera në interes të qytetarëve të së dy vendeve.
Ambasadori Mulltanovski, vlerësoi se është i impresionuar nga progresi që Maqedonia e arriti vitin e fundit, posaçërisht rreth marrëveshjes me Greqinë rreth kontestit me emrin dhe shprehu kënaqësi nga vizita vijuese e kryeministrit Zaev, i cili së bashku me delegacion qeveritar, më 27 qershor do të udhëtojë në Varshavë dhe do të realizojë takim me kryeministrin polak Moravjecski.
Zaev theksoi se Maqedonia do të mbetet e përkushtuar në ndërtimin e miqësisë dhe bashkëpunimit rajonal, duke nënvizuar se Polonia dhe Grupi i Vishegradit (V4), ku ajo është anëtare së bashku me Hungarinë, Çekinë dhe Sllovakinë, është imperativ për atë se si ndërtohet partneritet dhe progres.
Njëkohësisht, kryeministri shfaqi shpresë se vazhdimi i bashkëpunimit të përbashkët me Poloninë dhe V4 do të kontribuojë për përshpejtim të integrimit evropian, zhvillimit, sigurisë dhe stabilitetit të Maqedonisë dhe vendet e Ballkanit Perëndimor.
Kryeministri Zaev dhe ambasadori Mulltanovski shprehën bindje se të gjithë partnerët dhe institucionet e të dy vendeve, do ta vazhdojnë bashkëpunimin e shkëlqyeshëm dhe mbështetjen e miqësisë midis qytetarëve të së dy vendeve, në drejtim të stabilitetit politik dhe hapje të mundësive për rritje të zhvillimit ekonomik të së dy vendeve.
(MIA)
