Kryetari i Kuvendit i Republikës së Maqedonisë, Talat Xhaferi, pas miratimit në mbledhjen e sotme e nënshkroi Ligjin për ratifikim të Marrëveshjes përfundimtare për zgjidhje të dallimit siç është përshkruar në rezolutat e Këshillit të Sigurimit të Kombeve të Bashkuara 817 (1993) dhe 845 (1993), ndërprerja e Marrëveshjes së përkohshme të vitit 1995 dhe vendosja e partneritetit strategjik.
Xhaferi më pas e dërgoi Ligjin në kabinetin e presidentit Gjorge Ivanov, i cili duhet ta nënshkruajë dekretin e tij.
Presidenti Ivanov ka afat prej shtatë ditëve për ta nënshkruar. Ai gjatë ditëve të kaluara kumtoi, ndërsa sot edhe përsëriti se nuk do ta mbështesë, e as do ta nënshkruajë marrëveshjen, sepse, sipas tij, është e dëmshme.
Nëse Ivanov e përdorë të drejtën e vetos, marrëveshja sërish shkon në procedurë kuvendore, por atëherë do të duhet të votohet me shumicë absolute, 61 deputetë duhet të votojnë “për”. Marrëveshja, në atë rast, sërish i dërgohet presidentit, i cili sipas Kushtetutës është i obliguar ta nënshkruajë. (MIA)
