Një delegacion i Kosovës, i kryesuar nga koordinatori i Qeverisë së Kosovës për dialogun me Serbinë, Avni Arifi, gjatë ditës së djeshme para përfaqësuesve të vendeve anëtare të Bashkimit Evropian në Bruksel i ka prezantuar të arriturat në procesin e dialogut mes Prishtinës dhe Beogradit.
Siç lajmëroi korrespondenti i MIA-s nga Prishtina, Arifi në deklaratë për gazetën “Zëri” thotë se gjatë këtij takimi Kosova ka ngritur çështjen e moszbatimit të marrëveshjeve të arritura me Serbinë.
Ai po ashtu njoftoi se janë dakorduar me zyrtarët e BE-së që Asociacioni i Komunave me shumicë serbe të formohet konform Kushtetutës dhe ligjeve të Kosovës pa kompetenca shtesë.
Delegacioni i Kosovës ka kërkuar përkrahje nga Brukseli në rrumbullaksimin e këtij procesi, si dhe në zbatimin e marrëveshjeve veçmë të arritura, mes të cilave edhe atë për energjetikë.
(MIA)
