Në Gjykatën Penale për sot është caktuar seancë e re nga gjykimi i të akuzuarve për tentimin për vrasje të deputetit Zijadin Sela, që ndodhi më 27 prill të vitit të kaluar në Kuvendin e Republikës së Maqedonisë.
Siç publikuan një pjesë e mediave, në seancën e sotme të ftuar për dëshmi janë kryetari i Kuvendit Talat Xhaferi, ministri Damjan Mançevski, deputeti Aleksandar Kiracovski dhe kryeministri Zoran Zaev.
Në seancat paraprake dëshmuan disa dëshmitarë, mes të cilëve edhe Zijadin Sela. Ata folën për ngjarjet dhe dhunën që ndodhi ndaj Selës më 27 prill të vitit 2017, kur Talat Xhaferi ishte zgjedhur kryetar i Kuvendit të RM-së.
Në këtë rast janë akuzuar Kire dhe Cane Gjorgjievski, Oliver Oshavkovski, Sasha Cenkov, Nikollçe Dimitrievski, Aleksandar Janevski-Toshta, Andrej Micov, Nikolla Vojminovski, Kosta Delov dhe Stojan Pavlovski-Kobra.
Në seancat paraprake të akuzuarit për tentim për vrasje të deputetit Zijadin Sela u shpallën të pafajshëm. Ata para Gjykatës thanë se e kuptojnë akuzën, por nuk ndjehen fajtorë dhe se atë do ta dëshmojnë në procedurën e mëtutjeshme.
Për këtë lëndë, këtë muaj janë caktuar pesë seanca.
Burimi: MIA
