CIVIL –Qendra për Liri e dënon ashpër sulmin mbi Arbana Xharrën, gazetaren kosovare, ish – kryeredaktoren e gazetës “Zëri”, e cila mbrëmë vonë u rrah brutalisht para banesës së saj në Prishtinë.
Disa orë para sulmimit, Xharra ka qenë mysafire në emisionin shqiptar “Oktapod”, në të cilin i ka kritikuar ashpër politikat e presidentit Erdogan dhe të Turqisë zyrtare, otomanizmin dhe islamizmin e dhunshëm që po zbatohet në Kosovë, i ka zbardhur emrat e personave publikë, shoqatave dhe institucioneve që financohen nga fondet e Erdoganit, e të cilët sipas saj në mënyrë të drejtpërdrejtë ose të tërthortë i promovojnë politikat e tij.
Para disa ditësh ajo u kyç në Partinë Demokratike të Kosovës dhe u deklarua se do t’i marrë të gjitha masat demokratike që i ka në dispozicion, që Kosova të mos ketë fare marrëdhënie me Turqinë dhe të luftojë kundër politikave të Erdoganit.
Policia e Republikës së Kosovës e ka konfirmuar rastin, ndërsa pas ndihmës së dhënë në Qendrën Klinike në Prishtinë, Xharra është lëshuar në mjekim shtëpiak.
Civili këtë sulm nuk e konsideron vetëm si sulm mbi grua – gazetare, por si sulm mbi lirinë e shprehjes dhe mbi parimet dhe vlerat demokratike.
Civili e dënon ashpër sulmin mbi gazetaren Xharra dhe u bën thirrje autoriteteve dhe institucioneve kosovare që sa më shpejtë ta zgjidhin rastin, si dhe kërkon ndëshkim të ashpër për kryerësit e kësaj vepre. Njëkohësisht, Civili kërkon mbrojtje më të madhe të gazetarëve në Kosovë, sepse kjo nuk është hera e parë që Xharra përballet me kërcënime dhe dhunë. Për shkak të kritikave të ashpra ndaj pushtetit në Kosovë, si dhe për shkak të paralajmërimit për aderimin e saj në PDK, ajo vazhdimisht ka pranuar mesazhe kërcënuese nga persona të panjohur, të cilët i kanë shkruajtur mbi muret e shtëpisë së saj në Prishtinë.
