CIVIL – Qendra për Liri, si organizatë për të drejtat dhe liritë e njeriut, dënon ashpër dhunën në çdo formë. Sulmet ndaj ekipeve të mediave janë krejtësisht të papranueshme dhe meritojnë të gjitha dënimet dhe sanksionet e rrepta ligjore.
Sulmi ndaj punonjësve të medias është krim, andaj sulmi i fundit ndaj kameramanit të TV Alsat -M është shkelje e rëndë e Kodit Penal. CIVIL përshëndet reagimin e shpejtë të institucioneve dhe kërkon që autorit t’i shqiptohet dënimi maksimal, si dhe dënimi nga opinioni.
Shprehim mbështetjen dhe solidaritetin tonë të plotë kameramanit dhe kolegjiumit të TV Alsat-M, thuhet në deklaratën e CIVIL-it.
Rrahja e gazetarëve është jo vetëm një krim i rëndë, por është një akt jashtëzakonisht imoral dhe frikacak! Të kërkosh lirinë, drejtësinë dhe demokracinë është detyrë dhe përgjegjësi fisnike njerëzore, jo tradhti. Rrahja, urrejtja dhe mbrojtja e krimit është tradhti!
CIVIL-i apelon te autoritetet kompetente që t’i japin fund gjuhës së urrejtjes dhe të sanksionojnë siç duhet narrativin e tillë si dhe krimet që mund të lindin nga gjuha e urrejtjes.
