Përfaqësuesit e CIVIL-it u takuan sot me ministrin e Drejtësisë, Krenar Llogën, ku kanë diskutuar për çështjet që kanë të bëjnë me ndryshimet e ardhshme të Kodit Zgjedhor, si dhe me proceset zgjedhore në përgjithësi. Kryetari i CIVIL-it, Xhabir Deralla, e njoftoi ministrin Lloga për planet e organizatës, si dhe për aktivitetet aktuale lidhur me zgjedhjet, monitorimin e zgjedhjeve, financimin politik dhe rekomandimet dhe idetë për reforma në sistemin zgjedhor.
Në takim u diskutua veçanërisht për aktivitetet për formimin e Grupit të Punës për ndryshimet në Kodin Zgjedhor. Ministri Lloga theksoi se oferta për kryetar të Grupit të Punës të zgjedhet përfaqësues i VMRO-DPMNE-së është e hapur. Qëndrimi i përbashkët se në këto procese është i nevojshëm bashkëpunim konstruktiv si nga partitë politike ashtu edhe nga sektori joqeveritar.
Duke pasur parasysh se zgjedhjet presidenciale dhe parlamentare janë parashikuar për vitin 2024, u hap edhe diskutimi se cilat janë prioritetet për ndryshimet dhe plotësimet në Kodin Zgjedhor, pas së cilës të dyja palët arritën në përfundimin se ai proces duhet të përfundojë jo më vonë se gjashtë muaj para mbajtjes së zgjedhjeve, që është rekomandim shumëvjeçar dhe i fuqishëm i OSBE-së, si dhe i CIVIL-it, ndërsa sigurisht që është edhe pjesë e rregullores ligjore. Në shumicën e proceseve zgjedhore në dhjetë vitet e fundit apo më shumë, ndryshimet në Kodin Zgjedhor janë bërë në kundërshtim me këto rekomandime, shpesh vetëm pak ditë para mbajtjes së zgjedhjeve.
Ministri Lloga dhe përfaqësuesit e CIVIL-it u pajtuan që një praktikë e tillë duhet të ndalet. Gjithashtu, të dyja palët pajtohen plotësisht se vendi ka nevojë për një Kod Zgjedhor krejtësisht të ri, por nuk ka kushte për një gjë të tillë, në prag të vitit zgjedhor, gjë që nuk përjashton mundësinë që përgatitjet për atë proces të fillojnë menjëherë.
Në takim, i cili zgjati më shumë se një orë, u diskutuan edhe një sërë çështjesh të tjera që kanë të bëjnë me kushtet dhe proceset shoqërore-politike në vend dhe më gjerë, si dhe ndikimin e tyre në proceset zgjedhore. Veçanërisht u theksuan çështjet që lidhen me dezinformacionet dhe propagandën. Takimi përfundoi me një angazhim të përbashkët për bashkëpunim të ngushtë në çështjet kyçe që kanë të bëjnë me zgjedhjet, por edhe në fusha të tjera që kanë të bëjnë me mbrojtjen e të drejtave dhe lirive të njeriut.
B.Jordanovska
