Kryeministri kosovar Albin kurti deklaroi se nevojitet marrëveshje me Serbinë që të mund të organizohet votimi i qytetarëve kosovar me dyshtetësi në zgjedhjet parlamentare dhe presidenciale serbe më 3 prill, lajmëroi korrespondenti i MIA-s nga Prishtina.
Sipas kumtesës nga pres shërbimi qeveritar për marrëdhënie me opinionin, Kurti në një takim virtual me ambasadorët dhe shefat e misioneve diplomatike, ka thënë se autoritetet në Prishtinë “nuk duan t’ua heqin të drejtën e votimit qytetarëve me dyshtetësi në Kosovë, por gjithashtu nuk munden as të veprojnë në kundërshtim me ligjet dhe Kushtetutën e shtetit”.
“Ndaj të dyjave do të sillemi me përgjegjësi”, u shpreh Kurti, në kumtesë, në të cilën shtohet se ai është në komunikim të përhershëm me shtetet e QUINT-it, gjegjësisht me ambasadorët e pesë shteteve më të fuqishme të akredituara në Kosovë – SHBA, Francë, Gjermani, Itali dhe Mbretëria e Bashkuar. Në takimin virtual është biseduar edhe për “situatën në rajon pas pushtimit dhe agresionit rus ndaj Ukrainës”.
“Republika e Kosovës që nga fillimi ka shprehur solidarizimin me Ukrainën dhe popullin ukrainas gjersa pa hezitim ka dënuar ashpër agresionin e Federatës Ruse, duke iu bashkuar BE-së, SHBA-së dhe botës demokratike në vendosjen e sanksioneve ndaj Rusisë”, thuhet në kumtesë.
