Kryeministri i Maqedonisë së Veriut, Dimitar Kovaçevski sot dhe nesër për herë të parë pasi është në funksion do të realizojë vizitë zyrtare në selitë e BE-së dhe NATO-s në Bruksel. Kovaçevski në mëngjes do të takohet së pari me sekretarin e përgjithshëm të NATO-s, Jens Stoltenberg, ndërsa në takim do të jenë të pranishëm edhe shefi i diplomacisë Bujar Osmani dhe ministrja e Mbrojtjes, Sllavjanka Petrovska.
Është paraparë konferencë e përbashkët e Kovaçevskit dhe Stoltenbergut rreth orës 9.30. Ndërkohë, pasdite kryeministri Kovaçevski do të ketë takim me kryetarin e Këshillit Evropian, Sharl Mishel si dhe kryetaren e Parlamentit Evropian, Roberta Mecola. Takimi me kryetaren e Komisionit Evropian, Ursula fon der Lajen është paraparë të premten paradite. Kovaçevski, pastaj do të ketë takime edhe me anëtarë të PE-së dhe ish eurokomisarin për zgjerim, Johanes Han.
Sa i takon eurokomisarit të tanishëm për zgjerim, Oliver Varheji ai gjendet në udhëtim, informuan nga KE-ja. Përveç Osmanit dhe Petrovskës, kryeministrin Kovaçevski në Bruksel do ta shoqërojë edhe zëvendëskryeministri për Çështje Evropiane, Bojan Mariçiq.
