Presidenti i Francës, Emanuel Makron, iu ka dërguar letra të gjithë ambasadorëve francezë në vendet e Bashkimit Evropian, në të cilat kërkon nga ai që intensivisht të punojnë për hapjen e bisedimeve me Shqipërinë dhe Maqedoninë e Veriut, transmeton Albanian Post.
Portali shqiptar sipas burimeve të tij nga Pallati i Eliseut, shkruan se Makroni ka vendosur dy data. Data e parë për zgjidhjen e problemit ndërmjet Bullgarisë dhe Maqedonisë së Veriut është 14 dhjetori, gjegjësisht deri atëherë dy vendet ballkanike duhet të arrijnë marrëveshje për veton bullgare për Maqedoninë e Veriut, që është pengesë për hapjen e bisedimeve edhe për Shqipërinë.
Data e dytë e vendosur nga Makroni, është 31 dhjetori. Deri në fund të vitit sipas Allbanian Post, presidenti i Francës ka kërkuar hapjen e bisedimeve me Shqipërinë dhe Maqedoninë e Veriut. Simbolika e 14 dhjetorit ka lidhje me takimin e shefave të vendeve të BE-së. Nëse marrëveshja arrihet deri në këtë datë, atëherë Unioni do të mundet ta vërtetojë fillimin e bisedimeve për Tiranën dhe Shkupin.
Ambasadorët francezë në BE i pret agjendë intensive e takimeve deri më 14 dhjetor. Albanian Post në analizën e tij edhe shton se ky është një nga hapat më konkret që merret nga një vend anëtar i BE-së për hapjen e bisedimeve. Shkaku kryesor për këtë shtytje nga Parisi zyrtar është fakti që Franca e ndërmerr kryesimin me Unionin nga 1 janari i vitit 2022. Parisi nuk dëshiron të ndërmerr një problem të vjetër të pazgjidhur, thekson portali.
Për këtë iniciativë Makroni ka marrë leje nga liderët e vendeve udhëheqëse në BE, në mesin e të cilave edhe nga kancelarja gjermane në largim Angela Merkel.
Albanian Post shkruan edhe se Maqedonia e Veriut tani është në një situatë të paqartë politike. Kryeministri Zoran Zaev paralajmëroi se do të japë dorëheqje nga pozita e kryeministrit, por kjo zyrtarisht ende nuk është bërë, ndërsa pritet edhe votëbesimi i Qeverisë së tij në Parlament.
