Ministri i Punëve të Jashtme i Republikës së Maqedonisë së Veriut, Bujar Osmani sot po qëndron për vizitë pune në Republikën Federale të Gjermanisë ku u takua me nikoqirin e tij, ministrin Federal të Punëve të Jashtme të Gjermanisë, Hajko Mas dhe ministrin e Shtetit për Evropën, Mihael Rot.
Siç informon MPJ, në fokus të bisedimeve në takimin midis Osmanit dhe Masit ishin përgatitjet para Samitit BE-Ballkani Perëndimor në Bërdo të Kranjës, tejkalimi i dallimeve me Bullgarinë dhe situatat e fundit politike në vendin tonë.
“Është fakt se Berlini është prijësi më i fuqishëm i perspektivës evropiane të Maqedonisë së Veriut dhe të të gjithë rajonit. Kemi Samit të rëndësishëm përpara nesh dhe mbështetja e partnerëve si Gjermania është e domosdoshme, para së gjithash edhe për kapërcimin e dallimeve me Bullgarinë në mënyrë që të zhbllokohet procesi, por edhe për rikthimin e kredibilitetit të BE-së në rajon duke u përballur në këtë mënyrë me skepticizmin në BE”, theksoi Osmani.
Takimi me ministrin e Shtetit për Evropën, Rot, siç njofton MPJ u shfrytëzua për riafirmimin e pozicionit gjerman lidhur me dosjen tonë evropiane, për çështjet aktuale rajonale, por edhe për diskutimin e hapave të ardhshëm dhe reformat e nevojshme për zhbllokimin e zgjerimit të BE-së.
“Ballkani gjeografikisht nuk është në periferi të Evropës, prandaj nuk guxon të jetë as në periferinë e vëmendjes politike. Diplomacia jonë është e përkushtuar në ndërtimin e marrëdhënieve të mira fqinjësore, bashkëpunimin rajonal dhe realizimin e vizionit për një të ardhme të parashikueshme evropiane”, tha Osmani.
