Agim Poshka, profesor, kantautor nga Struga me video mesazh për Nismën e CIVILit “Bëje dallimin, respektoji dallimet”.
Unë vij nga Struga, një nga shumë qytetet që kanë lumenj, dhe marrëdhëniet ndëretnike mund ti krahasojmë me bashkëjetesën që e kemi me lumenjtë tonë. Jetojmë në krah të këtyre lumenjve, fatkeqësisht, në krah të etnive, të njëri tjetrit, por asnjëherë me njëri tjetrin.
Do të kisha dashur që këto marrëdhënie të jenë shumë më progresive, shumë më të natyrshme, ashtu siç e pranojmë diversitetin në natyrë, ta pranojmë diversitetin e njëri tjetrit, të etnive të ndryshme, sepse diferencat midis grupeve etnike janë thesar dhe nuk janë fatkeqësi, në çdo shoqëri.
Vlerat evropiane janë kryesisht vlera humane. Në esencë të tyre kanë që njeriu është pjesë e natyrës, që njeriu nuk është qendra e rruzullit tokësor. E njëjta vlen edhe për etnitë që jetojnë në Maqedoni. Asnjë nga ne nuk është qendër e universit, dhe të gjithë duhet të funksionojmë së bashku që të kemi një harmoni, gjë që shumë i duhet këtij rajoni.
Motivi im të marr pjesë në këtë Nismë, është shumë i thjeshtë. Unë dua që fëmijët e mi të jetojnë në një realitet shumë më të ëmbël, sesa ai në të cilin unë kam jetuar. Dhe besoj se me këto nisma do të ngrihet vetëdija dhe do të bëhet shumë më e lartë dhe më e ndritshme.
