Komisioni Evropian njoftoi se një pjesë e shumave të premtuara të ndihmës makroekonomike do të dërgohen sot në Maqedoninë e Veriut, si dhe në Kosovë, Mal të Zi dhe Tunizi, raporton MIA nga Brukseli.
Nga tre miliardë euro ndihmë makroekonomike të dhuruar fqinjëve të BE, Komisioni Evropian dërgon sot 80 milion në Maqedoninë Veriore, 50 milion në Kosovë, 30 milion në Malin e Zi dhe 300 milion në Tunizi.
Komisioneri i Ekonomisë i BE Paolo Gentiloni e përshëndeti lajmin si një “hap konkret përpara” në luftën kundër Covid-19 dhe pasojat e tij dhe u zotua se BE mbetet e vendosur për të ndihmuar fqinjët e saj në këto kohë të vështira.
Për Maqedoninë Veriore, kjo është kësti i dytë dhe i fundit i 160 milion eurove të planifikuara të ndihmës makroekonomike.
Komisioni Evropian tha se vendi kishte përmbushur kushtet për lëshimin e këstit të fundit, i cili përfshinte forcimin e qeverisjes fiskale dhe transparencën, luftimin e korrupsionit, përmirësimin e mbikëqyrjes së sektorit financiar si dhe klimën e biznesit dhe trajtimin e papunësisë së të rinjve.
