Kryetari i Kuvendit të Republikës së Maqedonisë së Veriut, Talat Xhaferi sot realizoi takim me Avokatin e Popullit të Republikës së Maqedonisë së Veriut, Naser Ziberi, me rastin e dorëzimit të Raportit vjetor për punën e Avokatit të Popullit të Republikës së Maqedonisë së Veriut për vitin 2020. Në takim ka qenë e pranishme edhe Suzana Saliu, zëvendësja e Avokatit të Popullit.
Gjatë takimit, siç theksohet në kumtesë është biseduar për çështje në fushëveprimin e punës dhe kompetencave të Avokatit të Popullit dhe aktivitete tjera. Avokati i Popullit Ziberi ka folur për çështjet kadrovike në institucionin që e përfaqëson, për natyrën dhe numrin e parashtresave të parashtruara nga qytetarët që i parashtrojnë me qëllim të realizimit dhe mbrojtjes së të drejtave të tyre civile, për ndikimin e pandemisë me Kovid-19 në natyrën e parashtresave të parashtruara dhe në punën e institucioneve.
“Kryetari Xhaferi shprehu interes për gjendjen dhe përmbajtjen e Raportit vjetor të Avokatit të Popullit dhe informoi për punën e Kuvendit, për qëllimet dhe aktivitetet aktuale”, thuhet në kumtesën e Pres shërbimit të Kuvendit.
Në takim u konstatua raporti ndërmjet institucioneve Avokati i Popullit dhe Kuvendi i Republikës së Maqedonisë së Veriut si i mirë, efikas dhe korrekt ndërsa në drejtim të Raportit vjetor, Xhaferi theksoi se deputetët do të informohen në kohë dhe si rezultat në këtë pritet edhe fillimi i procedurës parlamentare për shqyrtimin e Raportit dhe miratimin e rekomandimeve që do të kishin dalë.
