Policia e Tetovës po punon në një rast të denoncimit në të cilin disa minorenë rrahin një fëmijë, ndërsa ngjarjen e kanë xhiruar dhe e kanë publikuar në rrjetet sociale në internet. Bëhet fjalë për ngjarje e cila kishte ndodhur në fshatin e Tetovës Përshec, para rreth një muaji.
“Mbrëmë një 45 vjeçar nga Përsheci i Tetovës në SPB Tetovë ka denoncuar se para një muaji, djali i tij minoren në fshat, ishte sulmuar fizikisht nga disa persona minorenë, bashkëfshatarë të tij, ndërsa pastaj videoja e xhiruar për këtë rast ishte publikuar në rrjetet sociale. Po ndërmerren masat për zbardhjen dhe dokumentimin e plotë të rastit dhe kundër të përfshirëve do të vijojnë padi adekuate”, informon Marjan Josifovski, zëdhënës i SPB Tetovë.
Policia e Tetovës edhe dje regjistroi një denoncim për sulm ndaj një minoreni që kishte ndodhur më 3 maj. Një banor i Otushishtes ka denoncuar në polici se në Tearcë të Tetovës, nipi i tij minoren ishte sulmuar fizikisht nga një person nga Përshoci. Sipas asaj që është denoncuar, sulmuesi ka përdorur edhe mjet të drurit.
