Kryetari i Komunitetit musliman shqiptar, Bujar Spahiu ka reaguar lidhur me ngjarjen serioze, që ndodhi në xhaminë “Dine Hoxha” në Tiranë, ku besimtarët u plagosën me thikë nga një 34-vjeçar.
Përmes publikimit në rrjetet sociale, Spahiu ju bëri thirrje organeve kompetente që ta zbardhin sa më shpejt këtë ngjarje që i lëndoi besimtarët në këto ditë të Ramazanit.
Ai thotë se është informuar nga Myftiu i Tiranës, Lauren Luli, nëpërmjet mediave, por për më tepër, imami i xhamisë Ahmed Kalaja, si edhe dëshmitarë okularë, të cilët kanë vërtetuar se sulmuesi ka hyrë nga rruga në xhami dhe ka filluar të sulmojë duke i plagosur besimtarët dhe personelin e objektit të kultit.
“Fatmirësisht, të lënduarit janë jashtë rrezikut për jetën. I lutemi Zotit për shërimin e tyre sa më shpejt. Personi është në duart e forcave të rendit. Kërkojmë nga organet përkatëse zbardhjen sa më parë të kësaj ngjarje, e cila lëndoi besimtarët në këto ditë Ramazani”, shkroi Spahiu.
Sipas informatave të fundit nga spitali në Tiranë, të lënduarit janë jashtë rrezikut për jetën, ndërsa ndaj njërit prej të plagosurve, i cili ka pasur plagë të thellë në pjesën e barkut, është kryer ndërhyrje kirurgjikale.
